Ina gruppa da 18 persunas spetga avant l’ustaria sin l’Alp Flix sin ils dus guids ch’arrivan punct las 10. Pervi da la trid'aura entschaiva la guida cun ina café ed infos en l’ustaria. Là sa barattan il biolog Oliver Dosch ed il herpetolog (perscrutader d'amfibis e reptils) Hans Schmocker cun raquintar e mussar fotografias.
Suenter sa metta la gruppa sin viadi tar insatge che vesa ora sco in pitschen mir da crap dà ensemen. Là haja savens vipras cruschadas. Mo perquai ch’i plova ed è fraid sa zuppan las serps da tissi lunsch giuaden sut la crappa ed i na fetschia betg senn da tschertgar ellas. Ma ils dus scienzads grischuns èn sa preparads era per questa situaziun. Els èn ids il di avant da bellezz'aura sin la tschertga da serps ed han piglià duas ch'els pon uss mussar.
Duas vipras cruschadas
En dus satgets da taila sa chattan las serps. Ma avant che prender ora ellas, tiran Oliver Dosch e Hans Schmocker en guants da protecziun. Ins na moria betg d’ina murdida da la vipra cruschada. Ma ir en l'ospital fissi lura tuttina il meglier, ed ina morsa fetschia sa chapescha era mal.
Els tegnan las duas serps da circa 40 centimeters en il maun – e cura che tuts han fatg fotografias mettan els la serp masculina e feminina giun plaun. Omaduas han in muster marcant da ziczac sin lur dies. La colur da basa è grisch, e la colur dal muster è tar la serp masculina naira è tar la feminina brina. I na saja betg adina uschè cler da pudair identifitgar la schlattaina da la serp vid sia colur.
L’entira gruppa stat en rudè enturn las serps. E suenter che tut las dumandas èn vegnidas scleridas pacheteschan Oliver Dosch e Hans Schmocker puspè las serps en ils dus satgets da taila. Quai per la guida dal suentermezdi.
Chattar, dumbrar e notar amfibis e reptils
Quai è ina da las lavurs da Oliver Dosch en il Parc Ela. Il giuven da 29 onns vuless savair nua ch’i ha quant blers amfibis, reptils e libellas e da tge sort. Lura po el reagir e porscher in meglier da chasa als animals. Pertge i na giaja betg uschè bain cun tut ils amfibis e reptils, di il Surmiran. Perquai saja uss da reagir spert per pudair salvar las spezias ch’èn periclitadas.
Uschia va Oliver Dosch cun in cudesch da notizias or en la natira e dumbra quants exemplars ch’i ha nua e da tge spezia.
Quai n’è betg propi exact. Per savair exact quant blers ch’i ha nua, stuessas lavurar cun marcaziuns e gliez è memia grond – quai fiss insatge per l’universitad.
Ma las datas ch’el rimna sajan impurtantas per insumma savair nua entschaiver a porscher in da chasa adattà, declera Oliver Dosch.
