Siglir tar il cuntegn

Header

cuntegn

Grischun Central Grond interess per la dieta da vischnancas 2017

Bun 250 represchentants da stgars 90 vischnancas s’inscuntran a la dieta da vischnancas en l’Arena grischuna a Cazas. Là als infurmescha il chantun Grischun davart fatschentas currentas.

Circa 250 persunas èn sa scuntradas en l'Arena grischuna a Cazas, ellas s'han laschà infurmar davart ils temas relevants dal departament da finanzas e vischnancas. La presidenta da la regenza Barbara Janom Steiner ha gì plaschair da l'interess ch'è danovamain stà grond per ina tala dieta. Per ella èsi impurtant ch'in barat regular d'infurmaziuns e d'ideas haja lieu tranter il chantun e las vischnancas.

Novitads dal departament da finanzas e vischnancas

La scheffa dal departament ha infurmà davart la revisiun totala da la lescha da vischnancas ch'è actualmain en lavur. Ulteriurs puncts centrals dal referat da Janom Steiner èn stads la realisaziun gartegiada da la refurma dal territori sco er las numerusas fusiuns dals ultims dus onns. Era tractà ha ella ils svilups ils pli novs en il sectur da la legislaziun fiscala chantunala sco era quels en il sectur da las stimaziuns chantunalas d'immobiglias.

Novitads da l'uffizi da vischnancas

Las autoritads da las vischnancas han survegnì infurmaziuns davart fatschentas currentas dals posts da servetsch da l'uffizi da vischnancas. Il manader da l'uffizi Thomas Kollegger ha orientà davart il stadi da la realisaziun dal model armonisà da contabilitad per preventivs publics MAC2 e davart la gulivaziun da finanzas. Plinavant ha el illustrà a maun da singuls exempels las explicaziuns da la presidenta da la regenza Barbara Janom Steiner concernent la revisiun totala da la lescha da vischnancas che vegn fatga actualmain.

Novitads dal sectur da la forza idraulica

Il cusseglier guvernativ Mario Cavigelli, schef dal departament da construcziun, traffic e selvicultura, ha referì davart ils svilups ils pli novs en il sectur da la forza idraulica e dals tschains d'aua. La fin da zercladur 2017 ha il Cussegl federal avert la consultaziun tar la revisiun parziala da la lescha davart il dretg da las auas. La reducziun dal tschains d'aua maximal, proponida sco soluziun transitorica, refusa la regenza grischuna. Per defender cun vusch unida ils interess dals chantuns da muntogna, vegn ella ad elavurar sia posiziun sin basa da la posiziun da la Conferenza da las regenzas dals chantuns alpins. En quest connex ha la regenza l'intenziun d'integrar uschè bain sco pussaivel er las posiziuns da las vischnancas.

Referats spezials

audio
Saira: Las vischnancas e lur prontezza d’infurmar
ord Actualitad dals 15.09.2017.
laschar ir. Durada: 2 minutas 15 Secundas.

«Nus faschain da sa zuppar» – uschia sa numna il titel in zic provocativ dal referat da Pius Kessler, schurnalist e docent da medias online. El ha raquintà davart sias experientschas cun las vischnancas sco collavuratur da las medias.

Thomas Leisinger, manader da la partiziun «Famiglia, uffants e giuvenils» da l'uffizi chantunal dal servetsch social ha punctuà l'impurtanza dal rinforzament da la lavur cun giuvenils. Quai ha el fatg ensemen cun Samuel Gilgen, manader dal post spezialisà jugend.gr.

Da la rait da medis grischuna Grisomed è stà preschent il mainagestiun Gieri Derungs. El ha referì davart la tematica «Provediment medical da basa – ina incumbensa strategica per politichers communals». Cun la preschentaziun dal nov chancelier chantunal Daniel Spadin è la dieta vegnida cumplettada.

RR novitads 15:00

Artitgels legids il pli savens