Siglir tar il cuntegn
cuntegn

Grischun Central Glisch verda per fusiun Valragn

La regenza grischuna ha acceptà la fusiun da las vischnancas da Valragn. Suenter che l'emprima emprova da fusiunar aveva fatg naufragi pervia dal «na» da Sufers, era la fusiun lura tuttina gartegiada tar la segunda emprova il december passà. Dentant mo cun Valragn, Nufenen e Spleia.

Anc enfin la fin da l'onn è Valragn ina vischnanca independenta.
Legenda: Anc enfin la fin da l'onn è Valragn ina vischnanca independenta. RTR, Federico Belotti

La fusiun va en vigur cun il cumenzament da l'auter onn. Il chantun sustegna la nova vischnanca cun radund 3,3 milliuns francs.

Magari dovri dus emprovas

Las votantas ed ils votants da las trais vischnancas da Valragn, Nufenen e Spleia han acceptà la fusiun tar la nova vischnanca da Valragn ils 8 da december 2017. Suenter che l'emprima emprova aveva fatg naufragi, perquai ch'ella era vegnida refusada da la vischnanca da Sufers, han las trais vischnancas participadas planisà da prender per mauns l'avegnir cuminaivlamain senza la vischnanca da Sufers. E quai davent da l'emprim da schaner.

Fusiuns èn nagut nov en Valragn

Fusiuns da vischnancas n'èn nagut da nov en Valragn:

  • L'emprim da schaner 2006 han las duas vischnancas da Medel (Valragn) e da Spleia fusiunà.
  • In project consecutiv ch'aveva sco finamira da fusiunar tut las quatter vischnancas da Valragn, Nufenen, Spleia e Sufers ad ina vischnanca da vallada, è vegnì suspendì l'onn 2008. Il cumenzament da l'onn 2013 èn las discussiuns davart ina fusiun puspè s'inflammadas. Il project è vegnì lantschà il schaner 2015. Ils 10 da zercladur 2016 èn las votantas ed ils votants da las vischnancas da Valragn, Nufenen e Spleia bain s'exprimids fitg cleramain a favur d'ina fusiun. La radunanza communala da Sufers percunter ha refusà la fusiun cun bunamain trais quarts da las vuschs.
  • Uschia han las trais vischnancas da Valragn, Nufenen e Spleia decidì il cumenzament da l'onn 2017 da realisar ina fusiun en trais. Sin fundament da las vastas lavurs preparatoricas en il rom dal project per ina fusiun da vallada dals onns 2015 e 2016 n'han betg tut ils secturs stuì vegnir elavurads da nov. Ils secturs tematics han ins mo stuì vegnir actualisads ed adattads. E tar la votaziun dals 8 da december 2017 è la fusiun lura vegnida approvada cleramain.

Nova vischnanca cun radund 600 abitants

Tras la fusiun a la vischnanca da Valragn resulta ina vischnanca cun circa 600 abitantas ed abitants, sco er cun ina surfatscha da var 137 kilometers quadrat. Il Cussegl grond vegn a tractar la missiva en la sessiun dal zercladur 2018. Cun questa fusiun sa reducescha il dumber da vischnancas en Grischun sin 106 per l'entschatta schaner 2019.

RR novitads 10:00