Siglir tar il cuntegn
Inhalt

Grischun Central Glatscheras: Nov tunnel bajegià cun metoda nova

Cun il tunnel Glatscheras sut Bravuogn ha la Viafier retica per l’emprima giada renovà in tunnel tenor ina nova metoda. Quella è vegnida elavurada dapi il 2011 ensemen cun divers spezialists, e saja da cumparegliar cun in nov tunnel, scriva la Viafier retica.

Il tunnel Glatscheras, ch’ha ina lunghezza da 334 meters, è vegnì engrondì e cuvert cun elements da betun. Quai è ina novaziun. Pli baud vegnivan tunnels sanads cun betun injectà.

Mintga 100 meters datti buttuns da SOS, ch’envidan ina illuminaziun entaifer ed ordaifer il tunnel. En in cas d’evacuaziun datti passapes ed in passamaun. Il project da pilot ha custà circa 17 milliuns francs. En l’avegnir vul la Viafier retica renovar tut ils tunnels tenor la nova metoda.

Dasperas il tunnel Glatscheras a Bravuogn è gia vegnì sanà il tunnel Sasslatsch I tranter Susch e Lavin. Sco terz tunnel vegn sanà il tunnel da Mistail en il nord da Casti. La Viafier retica ha 115 tunnels cun ina lunghezza da 60 kilometers. Ils proxims 50 onns duain 75 da quels vegnir sanads.

RR actualitad 08:10