Siglir tar il cuntegn
cuntegn

Grischun Central Glatsch artifizial da Lai daventa pli pitschen

Il cussegl communal da Vaz ha approvà per mauns da l’urna in credit brut da 670’000 francs per far la proxima stagiun d’enviern ina patinera sin la plazza da sport a Lai ed in glatsch natiral per giugar curling. In credit da 670’000 francs è vegnì approvà per renovar la tegia d’alp Scharmoin.

Uschia duai il glatsch da Lai vesair ora l'enviern proxim.
Legenda: Uschia duai il glatsch da Lai vesair ora l'enviern proxim. mad

L’uschenumnà «Iis Paradiis» ch’è stà installà las davosas duas stagiuns d’enviern, na duai betg pli vegnir cuntinuà pervi dal deficit memia grond. Persuenter datti in glatsch artifizial pli pitschen, ina plazza per tir da tschoccas. Plinavant duai dar ina plazza da curling cun glatsch natiral. Da nov duai dar spazi da giugar per uffants, nua ch’els pon per exempel bajegiar iglus, umens da naiv e far autras activitads.

La proxima stagiun d'enviern vegni a dar in spazi da glatsch da total 3'430 meters quadrats, quai è in pau dapli che l'onn avant. Perquai ch'igl ha dentant pli pauc glatsch artifizial, èsi pussaivel da spargnar custs. Il deficit da la davosa stagiun d'enviern da 615'000 francs duai la proxima stagiun d'enviern vegnir reducì sin 444'000 francs.

Tegia Alp Scharmoin vegn renovada

Tranter auter datti ina nova cuschina, ina nova stiva ed in’ustaria da scua. Ils indrizs sanitars duain daventar accessibels per sutgas cun rodas. La tegia d’alp Scharmoin vegn durant la stad duvrada d’in pastur. L’enviern na vegn la tegia betg nizzegiada. Evaluaziuns da las Pendicularas d'avant in pèr onns èn vegnidas tar la conclusiun, ch’in diever da la tegia durant la stagiun d’enviern na saja betg raschunaivel.

In plan da la tegia che duai vegnir renovada.
Legenda: In plan da la tegia che duai vegnir renovada. mad

RR novitads 06:00