Sco quai che Alireza Darvishy (58) ha ditg envers RTR, saja la vita pli baud stada pli difficila per persunas cun in impediment da la vesida. Cura ch’el haja fatg ses studi d’informatica, haja el per exempel gì da laschar preleger tut la materia da ses camarats, cun tadlar las registraziuns sin bindel haja el lura pudì emprender.
Digitalisaziun sco schanza
Oz saja tut vegnì pli simpel. I dettia cudeschs digitals, cun programs saja pussaivel da laschar preleger ils cuntegns da paginas d’internet, ed er il telefonin saja stà ina da las grondas revoluziuns per persunas cun vesida restrenschida. Il svilup giaja però enavant, uschia dettia gia prototips d’ina channa ed in chalzer che gidia a navigar e quai cun agid da vibraziuns. Potenzial vesa Darvishy en la mobilitad. En il traffic public dettia anc bleras chaussas che possian vegnir meglieradas. A lunga vista possia el schizunt s’imaginar, ch’i dettia ina giada vehichels che van a moda autonoma fin tar il binari giavischà.