Gian Sonder è nov president da la URS

Gian Sonder da Salouf è il nov president da l’Uniun Rumantscha da Surmeir URS. El entra en uffizi l’emprim da schaner 2017. Sonder succeda a Filip Dosch, che demissiunescha pervi da la limitaziun d’uffizi da nov onns.

Filip Dosch (saneser) surdat la fin da l'onn ses uffizi a Gian Sonder.

Legenda da maletgs: Filip Dosch (saneser) surdat la fin da l'onn ses uffizi a Gian Sonder. RTR/fb

Da nov vegn Filip Dosch ad esser en suprastanza da la URS, quai è vegnì decidì a la radunanza generala da l’Uniun Rumantscha da Surmeir gievgia saira. Ord raschuns famigliaras banduna Gion Capeder la suprastanza. Confermads en suprastanza èn vegnids Daniel Dedual, Giancarlo Lozza e Rico Liesch.

L’incumbensa da l’Uniun Rumantscha è d’edir la Pagina da Surmeir. Pli baud aveva la URS era l’incumbensa da la tgira dal rumantsch – dapi l’onn 2006 fa quai l’Uniun Rumantscha Grischun Central.

Preventiv prevesa minus per Pagina da Surmeir

Sco quai che la URS ha infurmà a la radunanza generala, prevesa il preventiv dal 2016 in minus da 1’600 francs, quai tar sortidas da 347’500 francs. Il quint dal 2015 ha serrà cun in plus da bun milli francs tar expensas da 356’450 francs.