Fusiun Surses vegn realisada

Otg da nov vischnancas han ditg GEA a la fusiun. Sche l'entira val fusiunescha, vegn decidì la fin d'avrigl. Alura decidan las votantas e votants da Savognin a l'urna davart la fusiun.

Il messadi da fusiun.

Legenda da maletgs: Il messadi da fusiun. RTR, F. Belotti

Las vischnancas da Bivio, Cunter, Marmorera, Mulegns, Riom-Parsonz, Salouf, Sur e Tinizong-Rona han ditg GEA a la fusiun. Cunquai èsi gia cler, ch'ina fusiun parziala daventa en mintga cas realitad. Averta è uss anc la dumonda, sch'i vegn a dar ina fusiun da l'entira val. La vischnanca da Savognin votescha sin basa da sia constituziun ils 26 d'avrigl a l'urna davart la fusiun.

Signals positivs da Savognin

Il medem mument sco en las autras otg vischnancas, ha era Savognin gì sia radunanza communala. Quella aveva dentant mo ina funcziun predeliberanta en connex cun la fusiun. In emprim pass en direcziun fusiun è però vegnì fatg. La radunanza communala da Savognin ha deliberà l'affar da la fusiun cun ina proposta positiva, vul dir per l'approvaziun da la fusiun, per mauns da l'urna ils 26 d'avrigl 2015.

2'400 abitantas ed abitants

La nova vischnanca Surses dumbra, sche Savognin fa era part, radund 2'400 abitantas ed abitants e cumpiglia ina surfatscha da circa 32'000 hectaras. La lingua uffiziala da scola è rumantsch, cun ina scola speziala per il territori da Bivio. Sut la resalva da l'approvaziun dal cussegl grond, va la fusiun en vigur l'emprim da schaner 2016.Resultats

Deliberaziun da la vischnanca da Savognin cun proposta positiva per mauns da l’urna dals 26 d’avrigl 2015: GEA: 63 NA: 29

Resultats

Resultats da las radunanzas communalas dals 27 da mars 2015

Bivio GEA: 59 NA: 10
Cunter GEA: 40 NA: 14
Marmorera GEA: 9 NA: 2
Mulegns GEA: 9 NA: 0
Riom-Parsonz GEA: 70 NA: 7
Salouf GEA: 64 NA: 12
Sur GEA: 20 NA: 4
Tinizong-Rona GEA: 65 NA: 22