Siglir tar il cuntegn
Inhalt

Grischun Central Fundaziun Scalottas scriva cifras cotschnas

La Fundaziun Scalottas ha fatg l’onn 2014 ina perdita da 465’000 francs tar expensas da radund 15 milliuns francs. La perdita vegn scritta giu dal agen chapital, ha communitgà la fundaziun ch’ha preschentà il mardi a Scharans il rapport annual.

Da sanester: Josef Joos, president cussegl da fundaziun; Andrea Simeon, manadra da gestiun; Luzi Tscharner, directur.
Legenda: Da sanester: Josef Joos, president cussegl da fundaziun; Andrea Simeon, manadra da gestiun; Luzi Tscharner, directur. RTR, F. Belotti

Dapi il 2011 haja la Fundaziun Scalottas fatg ina perdita da dapli che dus milliuns francs. Ina gronda sfida per l’avegnir saja la nova lescha d’integraziun da persunas cun impediments, ha ditg Luzi Tscharner, il directur da la Fundaziun Scalottas.

Naginas purschidas novas

Plinavant ha la fundaziun infurmà davart la nova strategia 2015 – 2018. En l’avegnir vul la fundaziun sa focusar sin las cumpetenzas existentas, e betg far pli grondas midadas tar las purschidas actualas.

Il cussegl da la fundaziun saja però avert per cooperaziuns cun ulteriuras instituziuns dal chantun, per uschia nizzegiar sinergias. Ultra da quai ha la fundaziun infurmà davart la cumpra da l’onn passà da la chasa Tanno. Da manaivel da las chasas existentas vegn renovada la chasa, nua ch’i vegn a dar plaz per ulteriuras otg persunas che dovran sustegn durant 365 dis a l’onn.

Actualmain porscha la Fundaziun Scalottas plaz a 12 uffants e 73 creschids cun impediments. Duas gruppas d’abitar èn spezialisadas sin blessuras dal tscharvè. La fundaziun ha in’atgna scola speziala per ils uffants.