Siglir tar il cuntegn

Grischun Central Forza idraulica renda tuttina - Axpo vul ina nova ovra a Bravuogn

A Bravuogn en Val Tuors vul l'Axpo construir ina nova ovra electrica, che duess producir in di energia per 3'800 chasadas. Radund 16-18 milliuns francs pudess l’ovra custar. Glindesdi è il project vegnì preschentà a la populaziun.

L'Ava da Tuors en vischnanca da Bravuogn.
Legenda: L'Ava da Tuors duai vegnir nizzegiada per la producziun d'electricitad. mad

Dapi l’avust 2015 vegnan fatgas mesiraziuns tar l’Ava da Tuors. Tenor l'Axpo vegnian fatgas anc per in onn mesiraziuns, la bilantscha d’enfin ussa saja gia positiva. La dumonda per daners dal KEV/ICF (indemnisaziun per cuvrir ils custs da la furniziun d’electricitad) haja l' Axpo gia fatg tar la Confederaziun.

Suveran decida quest onn

La vischnanca da Bravuogn vul laschar decider il suveran anc quest onn en ina decisiun da princip, sch’el vul lubir l’ovra idraulica pitschna. Quai ha confermà envers RTR Peter Nicolay, il president communal da Bravuogn. Cun ils pretschs d’aua actuals possia Bravuogn quintar cun tschains d’aua tranter 150’000 – 180’000 francs, uschia Nicolay. L'Axpo planisescha da pudair inoltrar la segunda part dal 2018 la dumonda da concessiun a la vischnanca da Bravuogn. Circa l’onn 2021 duain las lavurs da construcziun cumenzar. En funcziun duai la nova ovra ir l’onn 2023.