Siglir tar il cuntegn

Header

video
Impressiuns dal barschament sin l'areal dal chastè d'Ortenstein
Or da RTR dals 19.06.2019.
laschar ir. Durada: 42 Secundas.
cuntegn

Fieu a Tumegl Stalla d'Ortenstein è arsa cumplettamain

Sin l'areal dal chastè Ortenstein en la Tumleastga ha brischà oz la stalla. I saja gartegià als pumpiers da l'entira regiun da proteger e salvar il chastè ed auters bajetgs vischinants. Fin tar intgins gnieus da burnida saja il fieu stiz fin enturn mezdi.

I deva il privel ch'il fieu giaja er sin auters bajetgs vischinants – pia era sin il chastè d'Ortenstein sez. I saja però gartegià als pumpiers che nagins bajetgs vischinants hajan piglià fieu, scriva la polizia chantunala. Daco ch'i ha brischà n'è anc betg enconuschent. La polizia investighescha en chaussa.

Las flommas hajan destruì la stalla dal tuttafatg. Il donn muntia a plirs tschients milli franc. La polizia n'ha fatg naginas indicaziuns davart donns da persunas u animals. Pervi dal fieu è er la via chantunala tranter Giuvaulta e Tumegl serrada per il traffic.

Bajetg istoric

Il chastè d'Ortenstein che giascha sin in grip marcant a l'entrada da la Tumleastga è vegnì bajegià enturn l'onn 1250. Cartaivlamain sa tracti d'ina fundaziun dals signurs da Vaz e da l'uvestgieu da Cuira. Dapi passa 15 onns hai in manaschi puril biologic sin l'areal.

RR novitads 10:00+

Artitgels legids il pli savens