Siglir tar il cuntegn

Header

Navigaziun

La laina è documentada bain.
Legenda: La laina è documentada bain. RTR, F. Belotti
cuntegn

Grischun Central Far frunt al pretsch bass da laina

Il franc ferm fa quitads a l’economia forestala. Per restar cumpetitiv han ins stuì reducir marcantamain il pretsch per laina radunda ils davos onns. Quai vul però betg dir ch'affars cun laina na rendan betg pli. RTR ha tranter auter visità in scrinari ed in manader d'ina resgia.

Resgia da Tinizong-Rona fa frunt a la concurrenza bunmartgada

En il Grischun han ils davos onns serrà differentas resgias communalas. En il Surses per exempel è vegnida serrada avant 2 onns e mez la resgia da Savognin – tranter auter pervi da la gronda concurrenza sin il martgà da laina ed investiziuns en novas maschinas che n’avessan betg rendì.

La davosa resgia en il Surses è quella da la vischnanca Tinizong-Rona. Cun novas ideas emprova la resgia da far frunt a la concurrenza cun pretschs bas. Sco quai che Peter Janutin, il manader da la resgia ha ditg, saja la resgia spezialisada sin giavischs spezials dals clients: Tut vegnia fatg tenor giavisch individual, per exempel bancs pli simpels, saivs individualas e laina che po vegnir duvrada per la construcziun d’instruments. Plinavant furnescha la resgia da Tinizong-Rona tut las zinslas per arder per il spital e la chasa d’attempads, sco era la scola cirquitala da Savognin e per differents privats.

La scrinaria da l’Argo a Surava porscha bler

La fundaziun grischun Argo poscha lavur a 500 persunas creschidas cun in impediment. En la scrinaria da Surava lavuran en media 6 fin 9 persunas. Actualmain fabritgescha la scrinaria per ils apiculturs chistas per avieuls. Tenor il manader da la scrinaria Claudio Elsa haja la scrinaria blers clients da la regiun che stiman la valur da la laina Grischuna. Cun la buna qualitad ins possia far frunt als products bunmartgads da l’exteriur.

A Surava vegnan producids differents products da laina sco tramagls, rauba per la cuschina u chistas per cloccas da vin e bler auter. Tar serias pli grondas fabritgescha la scrinaria tut tenor las pussaivladads era tenor giavisch dal client. L’onn 2011 è la scrinaria vegnida construida da nov per 2.35 milliuns francs, da quels ha il chantun surpiglia 950’000 francs, 1,5 milliuns ha pajà la Argo.

Mobiglia certificada cun il label dal Parc Natiral Beverin

La scrinaria TM da Ziràn ha elavurà ina mobiglia modulara, che po vegnir cumbinada l’ina cun l’autra. Il sistem ha num «randulina». La laina deriva dal Parc Beverin. Ed ina scrinaria da Tenna ha elavurà il «Safier Träumer», ina sedia cumadaivla che porscha plaz per 1 u 2 persunas. Quels products vegnan vendids cun il label dal Parc Beverin.

Audiogalerie
Ils products cun il label dal Parc Natiral Beverin

Anzahl Audios: 1

Scrinaria a Latsch producescha laina per instruments

Cun grond success exporteschan ils dus frars da la Val d’Alvra Andrea e Rico Florinett laina per producir instruments. La laina vegn exportada en passa 40 pajais. Il curs aut dal franc Svizzer s’accorscha la firma Tonewood SA da Latsch/Bravuogn betg grond. Cun quai ch’ina gronda part dals exports va en ils Stadis Unids da l’America, nua ch’il curs da valuta è sa revegnì, marschan ils affars vinavant bain. Quai ha ditg Andrea Florinett.

Era il pretsch per laina radunda ch’è sa sbassà n’haja nagina influenza sin ils affars: Affars cun laina per instruments sajan ina nischa – ed ils pretschs sajan restads stabils, ha Andra Florinett ditg plinavant.

Firma da Cunter restaurescha chasas veglias

La firma Von Büren da Cunter restaurescha en l’entir chantun chasas veglias. A Cunter datti in fitg grond magasin cun blera laina veglia, e plirs tschients portas cun tut ils scharniers necessaris. La gronda lavur vegn fatga en l'Engiadina. La firma ha però era renovà la clavadeira da Sontga Crousch a Riom, dal festival cultural Origen.

Actualitad la bunura 06:00