Per Giovanni Netzer, l'intendant dal festival, munta «Exodus» plinavant il prender cumià da bleras Rumantschas e Rumantschs ch'èn emigrads sco mercenaris, pastiziers ubain architects en l'exteriur.
Ferm accent sin il saut cun ballet internaziunal
Il programm 2015 metta in ferm accent sin il saut. Ils coreografs Yuka Oishi, Eno Peci, Peter Leung e Juanjo Arques laschan saltar il balett da Wiena, Amsterdam e Hamburg en il chasti a Riom ed en il clavà Clavadeira.
Fugitivs era cun «Benjamnin» da Gion Antoni Derungs
In toc sco fatg per la tematica da fugitivs è plinavant l'opera «Benjamnin» da Gion Antoni Derungs. Ella vegn giugada al festival suenter il 2006 per la segunda giada - però en nova interpretaziun ed en in nov lieu.
«Clavadeira» è pront
Suenter 4 onns renovaziun po Origen avrir il fenadur 2015 il clavà «Clavadeira», nua ch'ils artists pon era far l'enviern lur producziuns. L'avertura dal clavà, sco era la nova dedicaziun a l'opera da Gion Antoni Derungs, èn er occurenzas per festivar il giubileum da 10 onns dad Origen. Netzer less a caschun dal giubileum guardar enavant e sa dumendar, co Origen vegn da seposiziunar sco fidaivel partenari per las instituziuns da la regiun.
RR novitads 20:00
