Siglir tar il cuntegn
cuntegn

Grischun Central Erox ed eroxas en la «Revista digl noss Sulom»

La nova «Revista digl noss Sulom» che cumpara ils proxims dis, tracta ils eroxs enturn nus ed en nus. Sco quai che la redacziun scriva en ina communicaziun, saja quai gartegià danovamain d’engaschar auturas ed auturs surmiranas e sutsilvanas ch’han scrit davart erox ed eroxas ed anc dapli.

La nova ediziun da la Revista digl noss Sulom.
Legenda: La nova ediziun da la «Revista digl noss Sulom». mad

«Eroxs èn er mo carstgauns», di il psicolog surmiran Gion Duno Simeon en la «Revista digl noss Sulom». Quella decleraziun vegn confermada en diversas contribuziuns da la novissima «Revista digl noss Sulom».

Eroxs èn il sportist ch’ha gudagnà ina medaglia d'aur sco era la dunna giuvna che dat in dachasa als uffants da la via. Era Benedetg Fontana na manca betg. Rafael Müller è suandà ils fastizs da Fontana da Cuira enfin a la riva da la Chalavaina.

Ma erox n'èn betg adina bainvegnids, sco ch’i sa mussa en la contribuziun da Dominique Dosch davart Giuseppe Gangale. El ch’è s’engaschà per il rumantsch ed en spezial per il sutsilvan.

Gronda schelta d'artitgels

Sper il tema principal «eroxAs» cuntegna la «Revista digl noss Sulom» era ina vasta schelta da contribuziuns. Benedetto Vigne maina il lectur cun ses text litterar en il mund da la musica taliana dals onns 50 e 60. En cuschina descriva Rina Steier la moda e maniera da nutriment e mangiar per il poppin en tgina enfin tar il muribund.

Da temps passads raquinta Romano Plaz cun las aventuras dals chavrers da Beiva, e Linard Candreia sa regorda a chaschun dal giubileum da 100 onns John Fitzgerald Kennedy da sia atgna uffanza e da l’assassinat dal president american.

Sin la dretga via

La redacziun cun Pia Plaz, Dominique Dosch e Rafael Müller haja per la nova «Revista digl noss Sulom» resguardà ils interess da tut ils lecturs – giuven e vegl – ed empruvà da mantegnair il bun mix da contribuziuns. Ils resuns dals lecturs e da las lecturas sin las davosas revistas cumparidas hajan mussà, ch'ins saja sin la dretga via, scriva la redacziun.

RR actualitad 08:00