Siglir tar il cuntegn
cuntegn

Grischun Central En il Grischun Central viva ina ludra

Sin fundament d'analisas d'excrements han ins pudì cumprovar ch'ina ludra viva en la regiun da Tumleastga Mantogna. Gia la primavaira 2015 han persunas ord la populaziun observà la ludra, quai communitgescha l'Uffizi da chatscha e pestga dal Grischun.

ludra
Legenda: La ludra para da sa chasar puspè en Svizra ed er en il Grischun. Gerhard Schultz

Ni il guardiaselvaschina ni traplas da fotos han fin ussa pudì confermar las obervaziuns. Mez avrigl 2016 han ins chattà rests d'excrements, che conferman ussa la preschientscha da l'animal. Cun in'analisa da gens èn ils excrements vegnids identifitgads sco excrements d'ina ludra.

La ludra è morta ora en la Svizra l'ultim tschientaner. Per l'emprima giada han ins pudì observar ina ludra il december 2009, medemamain en il Grischun. A Rehanau è l'animal vegnì filmà d'ina camera ch'observa e surveglia la migraziun da peschs. Dapi il 2010 mancan dentant ils fastizs da quest animal.

excrements d'ina ludra
Legenda: Ils excrements chattads en la Tumleastga Marcel Züger, Pro Valladas

Dapi lura han ins pudì identifitgar cleramain ulteriurs tschintg exemplars en Svizra. Las ultimas observaziuns derivan da la regiun da Berna ed il chantun Genevra. Tranter Thun e Berna ha ina trapla da fotografia schizunt pudì fotografar l'onn passà regularmain in'entira famiglia da ludras.

RR novitads 11:00