Emprim festival da techno e house a Cazas

Ils 7 d’october datti en l’Arena Grischuna a Cazas in festival da musica electronica. Sco quai ch’il comité d’organisaziun scriva en ina communicaziun, n’haja enfin oz anc mai dà in tal eveniment en la regiun.

Al festival datti preschentaziuns live da dj’s sco Mike Candys e DJ Cruz. Da la partida èn era Jack Holiday, Luca Testa, Robotronika e Zoree. Per ils visitaders dal festival datti bus da notg vers Cuira e Tusaun, u blers parcadis per ils visitaders che vegnan cun l’auto. Il prà davos l’arena stat a disposiziun per campaders. Ils organisaturs quintan cun 800 fin 1’500 visitaders.

Adina dapli musica a Cazas

En l’arena Grischuna che ha trais hallas pli grondas che pon vegnir affittadas, datti adina dapli concerts e festivals da musica. Per exempel ha la notg da schlagher gia tradiziun, ed era chors e la Brass Band da Cazas èn giasts regulars. Sco quai che Michaela Ganz, la responsabla da communicaziun da la Graubünden Vieh, ina figlia da l’uniun purila Grischuna ha ditg, beneventian ins che la diversitad d’eveniments daventia adina pli gronda. La primavaira e l’atun sajan las hallas mintgamai occupadas fitg bain, i dettia però schon anc potenzial vers ensi. Perquai sajan ins quest onn era preschent a l’exposiziun d’atun a Cuira, a la GUARDA. Ins veglia far attent la glieud, ch’i dettia betg lunsch davent da Cuira hallas che pon vegnir affittadas per divers eveniments.

RR actualitad 08:00