Siglir tar il cuntegn

Grischun Central Dunnas en il Lions Club Savognin/Surses

Avant dus onns ha il Lions Club Savognin/Surses decidì, da prender si era dunnas. Ussa ha il club quatter interessentas.

vista sin il vitg da Savognin
Legenda: Il Club da Lions da Savognin è er avert per dunnas. RTR
Guido Luzio, il president dal Lions Club da Savognin.
Legenda: Guido Luzio, il president dal Lions Club da Savognin. RTR, F. Belotti

Sco quai ch’il president dal Lions Club Savognin/Surses Guido Luzio ha ditg, ins veglia s’avrir in zic. La decisiun da prender si dunnas saja crudada cun ina gronda maioritad.

Las quatter dunnas ch’èn ussa vegnidas prendidas si en il club, pon la fin da l’onn decider definitiv, sch’ellas vulan restar commembras. Sco quai che Guido Luzio ha ditg, ins haja guardà d’avair ina diversitad da professiuns en il club, quai saja ina da las pretensiuns dals statuts.

Il Lions Club è vegnì fundà il 1917 en ils Stadis Unids, quai cun il motto «We Serve». Far dal bun ad auters e metter il servetsch envers ils auters, sur l’agen profit. Il Lions Club Savognin/Surses è vegnì fundà l’onn 1992, il club padrin è quel da Lai.