Igl è in tren per il viadi Vienna-Turitg, ils 14 da mars 2022. Igl ha pauca glieud en il tren. Nus viagiain cun noss mini-chaun, in vulpet ch’ha num Charm. El è temelitg, el n’urla betg ed el na dorma betg, el è gnervus, sch’el na senta betg noss mauns en vischinanza. Perquai charsinain nus el trasor.
Igl è stà in lung viadi. Sper nus sesevan carstgauns da l’Ucraina, duas dunnas e quatter uffants. Nus avain discurrì in zic cun ils mattets. In aveva 15 onns, l’auter 11. Igl è sa mussà ch’els eran da viadi senza lur geniturs. Quels èn restads en l’Ucraina – ed en Svizra spetga lur onda. Ch’els vegnian ad abitar tar ella.
Las dunnas na savevan anc betg nua ir. Il bigliet era per Turitg, e lura …?
Tuts eran stanchels dal lung viadi e da l’intschertezza. Nagin na pudeva s’imaginar da viagiar en tala maniera – senza rauba, senza finamira, senza raps. Mia mamma ed jau essan viagiadas savens pli baud. Nus ans preparavan per in viadi. Igl è adina stà ina bella experientscha, cun bleras bunas impressiuns. Ma uss ans sentin nus mo anc stanclas e confusas. Mia tatta bragia perquai che sia sora è restada a Charkiv. Ella ha 85 onns e na vuleva betg bandunar ses dachasa.
Nus avain era laschà enavos nossa chasa a Charkiv. Tge vegn a schabegiar? Tge pudain nus spetgar? Nagin na sa … Uschia viv’ins, fa plans, cumpr’en – e lura statt’ins cun ina pitschna tastga en in pajais ester, irrità e plain tema. Ins na sa betg, sch’i vegn a dar in lieu, nua ch’ins po turnar. Ed ins na sa betg, schebain ins vesa anc ina giada la patria.
Charkiv vegn bumbardà permanentamain. Bler vegn devastà. Nus empruvain da betg discurrer da quellas chaussas terriblas, ma noss patratgs turnan adina puspè tar la dumonda:
Pertge? Pertge? Tge succeda sco proxim cun nus? Co duain nus viver en l’avegnir?
Jau poss gia tradir: Nus avain gì gronda fortuna! Nus savevan nua che nus giain. Nus essan vegnids envidads dad in um grondius, mes ami Franz Dosch. El sustegna mai dapi ils emprims dis da guerra ed ha envidà mai e mia famiglia e mes chaun en sia bella chasa en las muntognas, a Tinizong. El ha retschavì nus sco ina famiglia. El è vegnì per nus ils 14 da mars 2022 a la staziun da Sargans – igl era bunamain anc notg – ed ha manà nus cun l’auto en sia chasa. El ha ditg: «Stai en mia chasa, jau sun fitg led che vus essas en segirtad.» Nus essan immens engraziaivels ad el per ses agid, per ses bainvegni cordial e ch’el ha gì talmain quità da nus. Franz ha gidà nus cun noss documents da fugitivs. Ses amis han purtà a nus ina pluna vestgadira. In cordial engraziament a tut ils carstgauns amiaivels che han tractà nus cun chapientscha e pazienza.
L’Ucrainaisa Elina Babkina è fugida ils 5 da mars 2022 or da sia citad natala Charkiv. Dapi dus mais viva ella ensemen cun sia mamma e sia tatta a Tinizong. En ina seria da tschintg «Diaris dad in’Ucrainaisa» raquinta Elina Babkina da sia fugia e da sia vita da las davosas emnas.
