La saira dals 11 da mars 2022 hani ditg a nus ch’i dettia ina pussaivladad dad ir fin als cunfins. Nus avain pachetà nossas chaussas, avain prendì cumià ed essan partids la damaun dals 12 da mars 2022 a las 6:00.
Puspè in lung viadi. Ma questa giada cun fitg pauc traffic. Nus essan stads 16 uras da viadi. La notg avain nus passentà tar parents da noss manischunz Alexander. Glieud dal tuttafatg estra ha dà albiert a nus, sco sche nus fissan parents. Grazia zunt fitg a tuts!
Grazia zunt fitg a tuts!
La damaun eran nus gia als cunfins cun l’Ungaria. Curiusamain n’eran betg blers qua. Als cunfins essan nus vegnids tractads fitg bain. Mia tatta ha survegnì in document (ella n’aveva betg in pass biometric) e noss chaun è vegnì intercurì d’in veterinari ed ha survegnì in pèr buccadas. Lura essan nus vegnids retschavids da voluntaris. Nus avain survegnì té chaud, paunins garnids ed ils uffants han survegnì dultschims. Ils voluntaris ans han gidà en il bus che ha manà nus en la proxima citad en in center da voluntaris, installà en la baselgia dals baptists. Là han persunas che discurrivan ucranais dumandà davart noss plans e supplitgà d'ans registrar. Blera glieud era là, trasor sa furmavan gruppas per ch’i na dettia scumbigls. Tut era organisà perfetg. A mia tatta han ins mesirà la pressiun dal sang ed ella ha survegnì tablettas. In pèr uras pli tard eran nus sin viadi vers Budapest.
Ina dunna giuvna e ses dus figls han accumpagnà nus. Ella fascheva quitads perquai ch’ella discurra mo ucranais ed ha supplitgà nus da gidar ella a Budapest. Voluntaris han chattà in hotel per nus, nua che nus avain pudì star cun noss animals e nua ch’i deva pretschs reducids per Ucranais. E puspè stuain nus engraziar per quest agid. Cordial engraziament!
Budapest ha retschavì nus ils 13 da mars 2022 cun sulegl. Nus essan ids en l’hotel e suenter a la staziun per cumprar bigliets. Igl aveva blera glieud a la staziun. Nus n’avevan betg quintà cun ina colonna talmain lunga, trais uras avain nus stuì spetgar en retscha per cumprar bigliets. Ma anc pli surprendent era insatge auter! Jau sun stada surstada quantas persunas che levan gidar nus. La glieud è vegnida encunter directamaing, ha offrì da pavlar ils animals, ha dà sandwiches, tschigulatta e fritgs. Igl ha era dà schuppa chauda, vestgadira, artitgels d’igiena e schizunt termagls per ils uffants. Era chasets per ils animals hai dà, perquai che senza chasets na pon ins betg ir cul tren.
Quai è stada l’emprima giada ch’ils pajais da la UE han lubì a fugitivs da viagiar libramain.
Durant che nus eran en colonna, avain nus entupà ina persuna interessanta. L’Ollandais Ferco era vegnì extra en l’Ungaria per gidar persunas da l’Ucraina. El gieva enturn cun in placat. Sin quel eri scrit: I dat trais plazzas en l’auto per ir en l’Ollanda. Nossa enconuschenta era interessada da quell’offerta. Ella n’aveva insumma nagin plan, sia suletta finamira era dad ir cun ses uffants uschè lunsch sco pussaivel da la guerra. Nus avain discurrì cun l’um ed igl è sa mussà ch’el era da Den Haag, ma el è gia stà savens a Budapest e discurriva in zic ungarais. Sias figlias èn voluntarias a Den Haag e gidan d’intermediar famiglias. Nus essan ans cunvegnids ch’el vegnia l’auter di en l’hotel per nossa amia Ekaterina e ses dus figls. Nus trais avain però cumprà in bigliet Budapest-Vienna e Vienna-Turitg. Sin ils bigliets eri scrit si «Solidarity». Quai è stada l’emprima giada ch’ils pajais da la UE han lubì a fugitivs da viagiar libramain. Jau hai salvà ils bigliets sco souvenir.
En il tren hai jau entupà mes camarat da classa e sia famiglia che jau n’aveva betg pli vis dapi 12 onns! Igl è stà ina entupada nunspetgada e fitg cordiala. Natiralmain che jau avess giavischà che las circumstanzas fissan stadas autras, betg uschè tragicas, ma da quels muments ma paran fatschas enconuschentas anc pli famigliaras. Il camarat da classa e sia famiglia èn ids vinavant a Leipzig. Nus avain prendì cumià dad els a Vienna. In mument fitg trist. Tant els sco nus n’eran betg da viadi sco turists, mabain sin la fugia da la guerra.
L’Ucrainaisa Elina Babkina è fugida ils 5 da mars 2022 or da sia citad natala Charkiv. Dapi dus mais viva ella ensemen cun sia mamma e sia tatta a Tinizong. En ina seria da tschintg «Diaris dad in’Ucrainaisa» raquinta Elina Babkina da sia fugia e da sia vita da las davosas emnas.
