La damaun, curt suenter ch’il scumond da sortir, ch’era vegnì ordinà sin fundament dal dretg da guerra, è vegnì annullà, avain nus entschet cun las preparativas per nossa partenza da Charkiv. Las preparativas èn stadas difficilas. Quella notg n’hai jau betg durmì per spira tema, ed a las tschintg ha il svegliarin scalinà. En mes chau er’ina gronda confusiun: tema, prescha, bleras tastgas, tge prender cun mai, tge betg? – Ma a las 6:30 dals 5 da mars 2022 eran nus finalmain en viadi. Amis han gidà nus da chattar la via la pli segira e libra – cun l’auto tras citad. Il mender è stà da bandunar il cunfin da la citad, perquai ch’en la citad vegnivi sajettà.
Dieu ha gidà nus sin l’entira ruta. Nus essan ids ordaifer la regiun da Charkiv. Qua eri gia pli ruassaivel. E là avain nus chattà benzin. Amis han gidà nus da chattar medicaments per mia tatta. Sin via per cumprar quels medicaments vai però vinavant fitg plaun, i dat grondas colonnas, nus na pudain betg guntgir, schizunt sin las vias las pli pitschnas datti lungas colonnas. I para sco sche nus fissan in’eternitad sin viadi, ma nus cuntanschain tuttina l’emprim lieu en mira e survegnin ils medicaments per la tatta. Quai ha quietà nus in zic.
Ma nus stuain ir vinavant, en in lieu segir. Amis han gidà da chattar in hotel, schebain ch’igl è grev quels dis da chattar in albiert. Tut ils hotels e las abitaziuns èn plainas cun carstgauns ch’èn fugids da l’Ucraina da l’Ost. Il di è lung e nus stuain chattar l’hotel avant ch’il scumond da sortir entschaivia. Uschiglio stuain nus passentar la notg sin l’autostrada.
Nus essan uss tuts, tuts Ucrains, ina famiglia.
Ma igl è gartegià! Nus eran a chaud ed avain pudì pernottar en l’hotel. Tut era sco en temp da pasch, mo che nus avain stuì stizzar las chazzolas. La damaun avain nus solvì ed essan puspè ans mess sin via. Igl era nunpussaivel da cuntanscher ils cunfins, la glieud era gia dus dis en colonna. Perquai avain nus decidì dad ir en il center da l’Ucraina. Igl era ina citad quieta, nagins sajettims ed igl avess dà qua in hotel u ina abitaziun. Nus avain passentà in pèr dis en in center da reconvalescenza – ensemen cun blers auters. Mintgin vegn tractà bain, bunamain la mesadad da las famiglias vegnan cun animals da chasa (giats, chauns, portgets da mar). Igl è era blers uffants. Glieud da Charkiv, Sumy, Kiev e Tschernigov. Nus stain in pèr dis qua per rimnar noss patratgs ed ans revegnir da la midada difficila, ma era per decider, tge far vinavant. Intginas famiglias vivan gia dapi l’entschatta da la guerra en quest cumplex, ils uffants han gia fatg amicizias e termaglian ensemen. I dat giaglinas ed era fasans e pavuns. In di fa in pavun la roda cun sia cua. Jau crai che quai saja in bun segn! Tut vegn bun! Tut vegn bun – malgrà las schlettas novitads e malgrà il fatg ch’ins auda era qua l’alarm d’attatgas ord l’aria. Il possessur dal cumplex quietescha nus, el di ch’i na dettia nagina raschun dad avair tema. Ma era en ses egls è da vesair la tema …
La televisiun en stanza funcziuna, ma nus na guardain betg – las novitads èn memia sgarschaivlas. L’entir temp essan nus en contact cun quels ch’èn restads a Charkiv. Fin uss na datti nagut consolant danor la scuverta che nus essan uss tuts, tuts Ucrains, ina famiglia. Ed en quest pajais entschaiva la damaun cun ils pleds «Allegraivel nov di. Co vai?» – e finescha cun: «Hajas ina notg ruassaivla».
L’Ucrainaisa Elina Babkina è fugida ils 5 da mars 2022 or da sia citad natala Charkiv. Dapi dus mais viva ella ensemen cun sia mamma e sia tatta a Tinizong. En ina seria da tschintg «Diaris dad in’Ucrainaisa» raquinta Elina Babkina da sia fugia e da sia vita da las davosas emnas.
