Avant las entradas dal tunnel dal San Bernardino han ins inaugurà novs indrizs da segirtad. Il sistem mesira la temperatura en differentas parts d’autos da vitgira en moviment. Sche quellas èn memia autas vegn signalisà al manischunz da tegnair airi sin in plaz marcà. Simultan alarmescha il sistem ils pumpiers che pon entaifer paucas minutas arrivar e giuditgar la situaziun.
Augment da segirtad
Cun questa prevenziun vul l’Uffizi federal da vias Astra impedir che vehichels piglian fieu en il tunnel e chaschunan uschè gronds donns. Sco igl è capità il matg 2018. Alura aveva in bus piglià fieu en il tunnel. Il medem sistem è gia en funcziun avant il tunnel dal Gottard.
Per engrondir vinavant la segirtad lascha l’uffizi era modernisar ubain renovar entaifer ils proxims onns divers auters sistems da segirtad. E quai vegn a succeder senza disturbar il traffic.
