Tar la tractanda trais decida il suveran da Savognin davart in credit per l’acquist da las parcellas nr. 899 e nr. 901 a Grava, ch’è en possess da las Pendicularas da Savognin SA. Per 450’000 francs (à 120 francs per il m2) vul la vischnanca da Savognin cumprar il terren che duai pli tard vegnir duvrà per realisar in nov hotel cun 168 letgs chauds.
La vischnanca prevesa da metter a disposiziun las parcellas als responsabels dal project, respectiv als investiders en dretg da bajegiar. Il project ha da far nagut cun l’auter project da l’auter maun da la via tar la veglia scrinaria Uffer: Là planisescha Enrico Uffer da la Uffer SA la construcziun da quatter chasas cun abitaziuns administradas.
Dapli cumpetenzas per la suprastanza
Tar la tractanda quatter decida il suveran da Savognin, sch’el vul conceder a la suprastanza communala la cumpetenza per disponer davart la disponibladad da las parcellas nr. 899 e nr. 901 a Grava. “L’intenziun è, ch’ins possia en curta vista realisar in contract cun dretg da bajegiar cun la gruppa interessada, quai cun l’avantatg ch’ins na stuess betg clamar anc ina giada la radunanza communala per la fatschenta”, ha ditg Patric Vincenz, il president communal da Savognin.
Cumpra da terren a Son Mitgel
Tar la tractanda tschintg decidan las votantas ed ils votants da Savognin davart in credit per l’acquist da la parcella nr. 48 a Son Mitgel, ch’è en possess da la 7460 SA. Tenor il messadi da votaziun sa chattia la parcella en in lieu ideal per in eventual niz per il commerzi u per il turissem.
Cunquai ch’ella è cunfinanta cun la parcella nr. 51 da la vischnanca, è la suprastanza da l’idea ch’i fissi da profitar da la chaschun e da cumprar la parcella nr. 48 da la 7460 SA, che vegn presidiada da Conrad Plaz da Savognin. Il pretsch munta a 200’000 francs, tar ina surfatscha da 402 m2.
Il president communal da Savognin ha ditg envers RTR, ch’il pretsch da circa 497 francs per m2 saja giustifitgà per il lieu en il center da Savognin. In plan concret per in project a Son Mitgel n’è il mument betg anc avant maun.