Siglir tar il cuntegn

Grischun Central Cursas da skis a Lai - emprim test per Peter Engler

Il deputà dal cussegl grond e CEO da las Pendicularas da Lai presidiescha dapi in onn e mez il comité d’organisaziun da las cursas da la cuppa mundiala da skis a Lai. El ha surpiglià quest uffizi da Silvano Beltrametti, ch’ha organisà la davosa cursa il 2016.

Peter Engler curt avant l'emprima cursa en l'arrivada a Parpan.
Legenda: Peter Engler curt avant l'emprima cursa en l'arrivada a Parpan. RTR, Federico Belotti

Il deputà dal cussegl grond e CEO da las Pendicularas da Lai Peter Engler presidiescha dapi in onn e mez il comité d’organisaziun da las cursas da la cuppa mundiala da skis a Lai. El ha surpiglià quest uffizi da Silvano Beltrametti, ch’ha organisà la davosa cursa il 2016. Las cursas da questa fin d’emna èn las emprimas che Peter Engler ha organisà.

Betg inventar da nov la roda

El n’haja betg stuì inventar da nov la roda, ha Peter Engler ditg envers RTR: «Jau hai constatà ch’ina gronda part da las lavurs funcziunan bain, quai entras ina lavur da rutina. Ed jau sun fitg cuntent ch'jau hai pudì surpigliar in comité d’organisaziun cun blera experientscha».

Il temp il pli intensiv saja stà quest’emna, cunquai ch’ins haja gì da far blera lavur supplementara pervi da la naiv nova ch’i ha dà l’emna passada. Sco proxim punct culminant stattan sin il program ils finals da las dunnas e dals umens da la cuppa mundiala l’onn 2021 – quai è la proxima gronda sfida organisatorica per Peter Engler.

RR actualitad 17:00