L'entschatta è Reinhold Ziegler ì da quai anora ch'i saja in exercizi. I è dentant spert stà cler che quai n'è betg il cas. Lura ha tut stuì ir spert. Chattar il lieu e salvar ils blessads. Quai haja dentant funcziunà tut fitg bain. Prendì ora ch'i saja stà difficil da chattar il lieu da l'accident.
Er Roland Farrèr, il cumandant dals pumpiers Alvra, è stà sin il plaz. En quai mument n'haja el betg gì peda da far gronds patratgs. Dentant uss sa dumondia el schon: Tge fiss stà sche ...? Ins possia en mintga cas esser cuntent ch'i na saja betg capità dapli. 25 minutas fin al lieu d'accident Tar l'accident da tren tranter Casti e Solas han ils pumpiers gì 25 minutas davent da l'alarm fin ch'els eran en il lieu. In fitg curt temp sch'ins mira nua che l'accident è capità. Dal tut cuntents n'èn els dentant betg cun quai, di Reinhold Ziegler, il cumandant dals pumpiers da Tusaun e responsabel per ils pumpiers durant las lavurs da salvament. Tenor el fissan els anc stads pli sperts al lieu sch'els avessan gì in camiun spezial che po charrar sin via ed er sin ils binaris. Quel na steva dentant betg a disposiziun en la regiun.
Tenor Hansueli Roth, inspectur dals pumpiers grischuns, saja in concept sin maisa che prevesa en l'entir chantun puncts cun tals camiuns spezials. Uschia ch'ins fiss en mintga lieu sin ils binaris entaifer maximal 60 minutas. Quai concept è vegnì elavurà ensemen cun la Viafier retica e duai i en vigur fin il 2015. Sin il pli tard il 2017 duain ils pumpiers essers scolads ed abels da salvar cun quai vehichel.
