Actualmain fa il chantun examinaziuns per guardar sch'i dat insumma pussaivladads per franar ch'il vitg da Brinzauls ruschna vinavant. Sche quellas mesiraziuns èn positivas datti, tenor il geolog chantunal Andreas Huwiler, duas variantas per franar ch'il vitg ruschna anc pli fitg da la plaunca giu.
Varianta 1 – betg fitg probabla
Far grondas perfuraziuns en la plaunca per pumpar ora l'aua. Il problem saja dentant che Brinzauls ruschna uschè spert, uschia che las perfuraziuns vegnissan destruidas avant che la sbuvada vegn pli plauna.
Varianta 2 – pli probabla
Ina varianta cumplexa cun gallarias. Quai fissan gallarias ch'ins pudess er charrar cun camiuns. Ord questa gallaria pudessan ins perfurar en la plaunca che ruschna ed uschia pumpar ora l'aua.
Cun questa varianta hajan ins gia fatg bunas experientschas en il chantun Tessin, declera Andreas Huwiler. A Campo en il district Vallemaggia han ins investì ils onns 80, 12 milliuns francs per uschè ina gallaria. Cun il resultat ch'i ha bunamain chalà dal tut a ruschnar a Campo.
RR actualitad 08:00
