Siglir tar il cuntegn

Header

Navigaziun

Visualisaziun: Uschia duai vesair ora la nova praschun a Realta.
Legenda: Visualisaziun: Uschia duai vesair ora la nova praschun a Realta. SRF
cuntegn

Grischun Central Co bajegiar ina praschun segira?

Ils profils èn gia tschentads e l'atun vegn cumenzà a bajegiar la nova praschun serrada a Cazas. Planisar e realisar ina praschun è dentant era per il chantun ina sfida - surtut quai che pertutga la segirtad.

«Nagin na vesa tut ils plans da segirtad»

Persunas ch'èn stadas involvidas en la planisaziun han stuì suttascriver in contract da confidenza e mussar in extract dal register penal. Plinavant na vesa nagin tut ils plans da segirtad da la praschun, mabain mintga planisader e lavurer be la part ch'el dovra. Quai ha il schef da l'uffizi da construcziun auta dal Grischun, Markus Dünner declerà ad RTR.

Cumenzar cun il mir

L'atun 2016 vegn cumenzà a bajegiar la praschun serrada Realta. Parallel cun exchavar il fundament - vegnia construì la saiv ed il mir da betun enturn il bajetg, ha ditg Markus Dünner vinavant. Uschia possian ins controllar meglier che betg mintgin sa movia sin il plazzal sco el veglia. Ils lavurers ston esser pronts da dar invista en lur extract dal register penal, els survegnan ina carta da legitimaziun per pudair entrar ed i dat controllas rigurusas.

A partir da la stad 2019 duai la nova praschun serrada porscher plaz a 152 praschuniers. Ella vala sco remplazzament per la praschun Sennhof a Cuira. Ils custs muntan a 120 milliuns francs - 33 milliuns contribuescha la confederaziun