En tut vai per la summa da bun 35 milliuns francs, che duessan vegnir investids a Savognin. Cun gronda maioritad ha il suveran da la vischnanca da Surses approvà tut ils affars en connex cun projects turistics.
Tar l’emprim project vul l’impressari Willy Ebneter construir in hotel da quatter stailas a l’entrada da la vischnanca, tar il segund project vul la Uffer SA construir a Grava in hotel da trais stailas, e trais chasas cun abitaziuns da vacanzas administradas.
Approvà era las ulteriuras fatschentas
La radunanza communala ha era concedì in credit senza tschains da 350'000 francs a favur dal Club da ballape Surses per la renovaziun totala da la plazza da ballape a Tinizong. La parcella tutga a la vischnanca da Surses. Per l’utilisaziun da la parcella è vegnì fatg cun il club da ballape in contract d’emprest per il diever cun ina durada da 30 onns.
Plinavant ha la radunanza communala approvà la revisiun parziala da la lescha da pumpiers, sco era la revisiun parziala da la lescha davart las taxas da giasts e turissem. La davosa è stada necessaria perquai che la nova Turissem Savognin Bivio Albula SA surpiglia a partir dal matg las incumbensas da l’uniun Savognin Turissem en Surses.
RR novitads 06:00+