«Chur Card» vala ussa era a Savognin

La carta d’indigens «Chur Card» vala quest enviern era tar las Pendicularas da Savognin. Quai è l’emprima giada ch’i dat in rabat en ina destinaziun ch’ha nagins lioms cun Cuira.

Cun la Chur Card datti quest enviern in meglier rabat che per ils indigens da Savognin.

Legenda da maletgs: Cun la Chur Card datti quest enviern in meglier rabat che per ils indigens da Savognin. Grafica - RTR

Durant la stagiun d’enviern survegnan ils possessurs da la «Chur Card» in rabat da 10% sin la carta dal di a Savognin. Plinavant pon els mangiar gratuit il menu en l’ustaria a Tigignas en la valur da 20 francs.

Sco quai ch'il directur administrativ da las Pendicularas da Savognin, Christian Prinz, ha ditg, sa tracti d’in’acziun unica per quest enviern. El crai ch’i dettia anc in grond potenzial tar la glieud da la citad da Cuira.

Ils da Cuira spargnan dapli ch'ils indigens

Sch'ins cumpareglia il rabat da la Chur Card cun il pretsch d'indigens sin la carta dal di, lura è il rabat per possessurs da la Chur Card schizunt meglier che la reducziun per indigens da Savognin sin la carta dal di. Dus exempels:

  • Chur Card: Carta dal di 51.30 enstagl da 57 francs, inclusiv è in bon per in menu ed ina bavronda en la valur da ca. 20 francs. Respargn = 25.70 francs.
  • Indigens da las vischnancas Alvra e Surses: Carta dal di 43 enstagl da 57 francs. Respargn = 14 francs.

Cuira beneventa collavuraziun

Tenor Markus Frauenfelder, il scrivant da la citad da Cuira, ins veglia far pli attractiva la Chur Card, cun porscher offertas era ordaifer il territori da la citad. Uschia dettia quai gia pli ditg rabats tar la pendiculara da Brambrüesch e tar la destinaziun da skis da Lai/Arosa.

Là ha la citad dentant collavuraziuns pli grondas. Per la pendiculara da Brambrüesch paja la citad da Cuira per exempel mintg’onn ina contribuziun e sin il territori d’Arosa posseda Cuira la Ochsenalp.

RR actualitad 12:00