Chattar il dretg pignol per il convischin

In pignol tutga simplamain en stiva durant il temps da festa. La vischnanca da Surses va en ses guauds per pignols. Pignols ch'ils convischins pon empustar. Il Radio Rumantsch accumpogna l'uffizi forestal da Surses ch’è a la tschertga dals pli bels pignols per lur vischins.

Bun 1,2 milliuns pignols da Nadal natirals chattan mintg’onn la via en las stivas svizras. La gronda part da quest pignols, numnadamain 60%, vegnan importads da l’exteriur. Els arrivan da pajais sco il Danemarc, la Svezia u la Germania. Quels pignols pon ins lura cumprar en las stizuns.

Persunas che van anc sezzas en il guaud a la tschertga dal pignol adattà, èn pli e pli stgarsas. Ils lavurers da l’uffizi forestal da la vischnanca da Surses han dentant anc la l'incumbensa d'ir en il guaud per pignols.

Pignols pigns u pignols gronds. Ils giavischs dals convischins da la vischnanca da Surses èn differents. Ils lavurers emprovan natiralmain d’ademplir ils giavischs e da chattar per mintgin il pignol da Nadal adattà.

Bun 75 pignols or dal guaud en Surses

Per ils emprims pignols è l’uffizi forestal gia stà l’entschatta dal mais december. Fin oz hajan els resgià bun 75 tocs, di Pascal Murbach, manader da l’uffizi forestal da Surses.

Quai è dentant mo bun in terz da tut ils pignols che vegnan era empustads. Bleras persunas veglian numnadamain il pign da Nordmann. Quests pignols na datti betg en ils guauds indigens, perquai cumpra la vischnanca da Surses quests pignols e venda alura els als abitants.

Chattà en l'archiv…

RR actualitad 08:00