Siglir tar il cuntegn
Inhalt

Grischun Central Chattà skelet a Savognin

Tar lavurs da chavar d’ina firma da construcziun, è vegnì chattà in skelet. La polizia ch’è vegnida infurmada davart il cas ha surdà quel al servetsch archeologic dal Grischun. Quel emprova ussa da chattar ora la vegliadetgna dal skelet.

Il skelet ch'è vegnì chattà a Savognin.
Legenda: Il skelet ch'è vegnì chattà a Savognin. Servetsch archeologic Grischun

Sco quai che l’archeolog chantunal Thomas Reitmaier ha ditg ad RTR, vegnia il skelet examinà da la Scola politecnica federala da Turitg. Cun in resultat ins possia quintar en radund dus mais. Il skelet saja probabel daplirs decennis enfin tschientaners vegl, schazegia Reitmaier. Probabel sa tracti d’ina sepultura. Perquai ch’ins haja chattà nagins supplements en la fossa, ins possia il mument betg anc dir dapli davart il cas. Il skelet è vegnì chattà l’emna passada dasperas la veia Tgaplottas a Savognin. Cun quai ch’il lieu dal chat è en ina zona da bajegiar, è il lieu interessant per il servetsch archeologic. Tar lavurs da construcziun futuras vegnia il servetsch archeologic a far sondagis avant las lavurs da construcziun. I possia esser ch’ins chattia en il conturn anc ulteriurs skelets, ha Reitmaier ditg plinavant.

RR actualitad bunura