Siglir tar il cuntegn

Grischun Central Chantun paja summa da record per fusiun

Il december decidan las vischnancas da Filisur e Bravuogn sch’ellas vulan fusiunar. Grategia la fusiun, lura datti 8’840’000 francs dal chantun – tant sco anc mai tar ina fusiun cun mo duas vischnancas.

Latsch ina fracziun da Bravuogn, vista sin la baselgia.
Legenda: Era Latsch, ina fracziun da Bravuogn, faschess part a la fusiun da Bravuogn e Filisur. RTR, F. Belotti

La situaziun finanziala da las duas vischnancas en val d’Alvra saja displaschaivlamain deplorabla, omaduas vischnancas vegnian sustegnidas finanzialmain gia dapi onns pervi dals gronds debits, ha ditg Barbara Janom Steiner, la scheffa dal Departament da finanzas e vischnancas.

«Schins vul propi dar la pussaivladad ad ina nova vischnanca da cumenzar cun ina basa finanziala acceptabla, lura èsi da diminuir ils debits e perquai è l’import uschè aut, nua che nus diminuin ils debits per otg milliuns», uschia la cussegliera guvernativa.

Reducir ils debits grazia offerta generusa

Tenor in rapport da la regenza grischuna ston ils otg milliuns francs vegnir duvrads per sminuir ils debits. Quels gidan a sminuir ils debits suenter la fusiun per 30%.

Era suenter quest pass èn ils debits per persuna anc adina tar in cunfin critic da 5’000 francs, stat scrit en il rapport da la regenza. Ed er suenter ina fusiun vegn la nova vischnanca anc ad esser sut la surveglianza dal chantun.

In sbassament dal pe da taglia ch’è actualmain sin 130% da la taglia chantunala simpla n'è era suenter la fusiun betg pussaivel.

Co sa cumpona il sustegn dal chantun?

La contribuziun da fusiun consista or d’ina promoziun da 615’000 francs, 8 milliuns per sbassar ils debits, 75’000 francs per sanar l’archiv da Bravuogn, 150’000 francs per installar uras d’aua a Filisur.

RR actualitad 11:00

Legenda: Barbara Janom-Steiner RTR, Michel Decurtins

«Fin oz n'avain anc mai sustegnì tar ina fusiun ina diminuziun dals debits.» Barbara Janom-Steiner