Siglir tar il cuntegn
Inhalt

Grischun Central Center per requirents d’asil a Spleia funcziuna bain

Tant il chantun sco era il turissem, hoteliers e la butia locala tiran ina bilantscha positiva quai che pertutga il nov center da transit ch’è avert dapi il mars da quest onn. Nagin discurra da problems pli gronds.

Salome Mathys da l'uffizi da migraziun.
Legenda: Salome Mathys da l'uffizi da migraziun. RTR, Federico Belotti

Actualmain vivan 68 persunas en il center da transit a Spleia, ha ditg Salome Mathys da l’uffizi da migraziun. En il center abitan persunas da la Siria, da l’Afganistan, dal Tibet, da l’Eritrea, da la Sri Lanka, da l’Egipta, da la Somalia e da l’Irac. Da quellas persunas èn radund in quart dunnas e tschintg èn uffants. Sco quai che Salome Mathys ha ditg, funcziunia il center a Spleia bain, problems pli gronds n'haja quai dà nagins enfin oz. Ins emprovia d'integrar uschè bain sco pussaivel la populaziun, ils funcziunaris da la vischnanca, ils interprendiders locals ed il turissem en las discussiuns enturn il center da transit.

Centers en il Grischun
Legenda: Centers en il Grischun. Grafica RTR

Nagins votums negativs

Ina pitschna retschertga da RTR mussa, ch’il center da transit a Spleia na chaschuna betg problems. Willibald Löschl, il directur dal hotel Bodenhaus ch’è vis-à-vis dal center da transit di, che fin oz saja tut stà quiet ed ins haja mai gì problems cun cussadents dal center da transit. Era desditgas da giasts n'haja quai dà naginas.

Plinavant sajan ils discurs cun il chantun stads buns. Uschia saja per exempel vegnì ademplì il giavisch da transferir il chantun da fimar per ils requirents d’asil davos la chasa, ch’era avant davant chasa sin il stradun principal. Era en la butia locala Volg n'hai enfin oz mai dà problems. La svieuta saja s’augmentada levet ed enguladitschs n'hajan ins mai observà. Era Viamala Turissem ch’ha ses biro sin la plazza dal vitg ha confermà, ch’il center da transit a Spleia na fetschia absolutamain nagins problems. Era da la pizzaria dal vitg è stà da sentir, ch’ils requirents d’asil na disturbian insumma betg, singulas persunas sajan era gia vegnidas a consumar en l’ustaria.

RR actualitad 07:00