Siglir tar il cuntegn

Header

Navigaziun

Charta da la Svizra cun 13 destinaziuns marcadas. En Grischun: Greina, Parc natira Beverin, Alp Flix, Bravuogn-Pass d'Alvra.
Legenda: Las 13 destinaziuns nua ch'il Bus Alpin è preschent. RTR
cuntegn

Grischun Central Bus Alpin Alvra è sa cumprovà

600 persunas èn viagiadas cun il Bus alpin sur il Pass da l’Alvra enfin la fin d’avust. L’onn passà eran quai mo 350. Quest plus saja d’engraziar a curs supplementars, dian ils responsabels.

Dapi questa stad porscha il Bus alpin duas giadas uschè bleras colliaziuns tranter La Punt e Bravuogn sco enfin ussa. Sco quai che Marc-Andrea Barandun, il maina fatschenta da Barvuogn-Filisur Turissem ha ditg, sajan ins cuntent cun las frequenzas fin ussa.

Sco reacziuns mussian, vegnian ils curs ulteriurs appreziads, cunzunt la colliaziun che cursescha la damaun pli baud davent da Bravuogn. L’urari da quest onn vegnia mantegnì era l’auter onn. El saja sa cumprovà, uschia Marc-Andrea Barandun. A partir da l’auter onn cumpara il Bus alpin sur il Pass da l’Alvra da nov era sur l’urari uffizial dal traffic public. Quai pudess tenor infurmaziuns dal Bus alpin manar a dapli frequenzas.

Preschent en 13 destinaziuns

L’Uniun Bus alpin porscha 13 colliaziuns da bus en regiuns da muntogna da la Svizra nua ch’i na dat uschiglio nagin traffic public ubain mo pauc. L’uniun è vegnida fundada l’onn 2011. Purtaders naziunals èn Auto da posta Svizra SA, il Club alpin svizzer CAS, la Gruppa svizra per las regiuns da montogna SAB e l’Associaziun traffic ed ambient ATA.

RR actualitad 08:00