Bungalows a Rona sa chattan en la zona d’industria

Tar il center da passlung a Rona èsi planisà da construir in parc da fin 24 chalets. Quatter da quels èn gia vegnids installads. Tenor retschertgas da l'emissiun da SRF «Schweiz aktuell», sa chattan quels però en ina zona da mastergn.

ils emprims chalets èn gia vegnids installads a Rona.

Legenda da maletgs: Ils emprims chalets èn gia vegnids installads a Rona. mad

Sco quai ch’il president communal da Tinizong-Rona Gion Francestg Schaniel ha ditg envers RTR, saja quai en la cumpetenza da la suprastanza da lubir era lieus d’abitadi en ina zona d’industria. La lubientscha saja vegnida dada la fin dal 2012. Tenor il manader da l’Uffizi chantunal per il svilup dal territori Richard Atzmüller na saja il chantun betg vegnì dumandà en chaussa, perquai che las vischnancas possian decider a moda autonoma.

Conflict d’interess

Ch’il project da chalets a Rona vegn realisà tranter auter d’in funcziunari dal chantun, na vesa Atzmüller betg sco problem. Brigit Wyss, la giurista da la Fondation Franz Weber discurra però d’in conflict d’interess. Pass giuridics na planiseschia la Fundaziun Franz Weber però nagins, ha ella ditg envers RTR.