Tschertas parts dal sbuvaditsch da Brinzauls sa movan puspè pli svelt. La raschun saja la naiv che lieuia – scriva la vischnanca d’Alvra. Il moviment dal vitg s’augmentia constant dapi il mars e muntia actualmain a 1,55 meters per onn. Tenor prognosas sa calma la situaziun durant stad, cura che la naiv saja davent. Plievgia durabla possia dentant puspè accelerar il moviment.
Meters per onn / trend dals ultims dus mais
- Plateau e Front: fin 3,1 m / constant
- vest: 6,5 m / creschent
- insla: 10,5 m / creschent
- Caltgeras: 3,7 / constant
- Vitg: 1,5 m / creschent
Construcziun dal tunnel da sondagi pli spert che pensà
La perforaziun dal tunnel da sondagi progredeschia meglier che planisà. 535 meters dal tunnel da 635 meters sajan gia chavads. Suenter in'interrupziun da 14 dis per ina segunda perforaziun recognosziun vegnia quest avanzament uss cuntinià.
Fin la fin zercladur vegnian chavads ils davos 100 meters, medemamain vulan ins rumper ora la quarta nischa e far la terza e quarta drenascha.
Il fanadur veglian ins cumenzar cun lavurs da betun e fin mez settember far ulteriuras perfuradas da sondagi e drenascha.
Evacuaziun dal tripticon da la baselgia
Plinavant sclereschian experts sco l’altar cun alas da la baselgia Sogn Calixtus pudess en il mender cas er vegnir evacuà. I sa tractia d’in dals pli impurtants altars dal Grischun.
Areals e figuras da l'altar ch'èn levamain accessibels vegnian controllads sin donns per evaluar co ch'ins sa evacuar quel. L'examinaziun cuzzia radund in onn.
Material da mendra qualitad che spetgà
Radund 40% dal material or dal tunnel da sondagi po vegnir duvrà sin il bajetg. Quai è pli pauc ch'oriund spetgà. Avant las lavurs avevan ins quintà ch'ins possia duvrar radund 70% dal material. Il crap da plattas exchavà è dentant pli rumpaivel che spetgà. El rumpa en parts uschè pitschnas, ch'ins na possia betg pli duvrar el per lavurs da construcziun. Perquai ston ussa radund 60% dal material vegnir dismess sin la deponia Crappa Naira.
Lavurs per projectar tunnel da drenascha han cumenzà
En cas ch'i sa resultass or dal tunnel da sondagi ch'i funcziuna da franar il Rutsch cun drenar profundamain l'aua, duai dar or dal tunnel da sondagi in tunnel da drenascha che vegn lura mantegnì a lunga vista.
Da projectar, lubir, submissiunar e surdar lavurs per quest tunnel cuzza in tschert temp. Per betg perder memia bler temp tranter la valitaziun dal tunnel da sondagi ed il cumenzar a bajegiar il tunnel da sondagi, han l'Uffizi da construcziun bassa dal Grsichun e la vischnanca Albula/Alvra gia cumenzà a projectar il tunnel da drenascha. En il meglier cas pudess ins lura cumenzar a bajegiar gia la primavaira 2023.