Siglir tar il cuntegn
cuntegn

Grischun Central «Bravugn è vegnì enconuschent en tut il mund»

L’idea da l’agentura da reclama turitgaisa ha fat ses serv: A Bravuogn dastgan ins puspè fotografar. Quai resorta dad ina communicaziun da la vischnanca da Bravuogn.

Limmat e Grossmünster.
Legenda: L'idea dal scumond da fotografar è naschida a Turitg. Keystone

«Bravuogn è vegnì enconuschent en tut il mund»: Cun quest facit cumenza ina «communicaziun da medias da la vischnanca da Bravuogn» cun la quala ch’i vegn fatg enconuschent, ch’ins astga puspè fotografar a Bravuogn. La vischnanca saja stupefatga da l'eco medial, che l’acziun haja gì per consequenza. I haja sa mussà, ch’il interess per Bravuogn saja enorm, vegn cità il president communal Peter Nicolay en la communicaziun.

Acziun sut batgetta da Grischun vacanzas

Davos l’acziun stettia l’organisaziun turistica chantunala Grischun vacanzas, che haja mess en pe l’acziun ensemen cun la vischnanca e Bravuogn/Filisur Turissem, è da leger vinavant. IL CEO da Grischun vacanzas, Martin Vincenz, sa mussa impressiunà dal success.

Idea è naschida a Turitg

En in'intervista sin la pagina persönlich.com declera il schef creativ da l’agentura da reclama Jung von Matt/Limmat, Dennis Lück, quai che stà davos l'acziun. Finamira saja stà numnadamain d’emprim ennà da far enconuschent las fotografias da Bravuogn e da svegliar uschia desideris, di il schef creativ da l’agentura en l’intervista.

L'agentura haja cuntanschì entaifer 24 uras passa 50 milliuns umans en tut il mund. E, uschia Dennis Lück, «tut quai cun 0 francs budget da media».

Sviluppà vinavant idea ensemen cun vischnanca

Per sviluppar l’idea fin al livel dad ina lescha communala ha l’agentura collavurà durant in mez on cun la vischnanca. I saja «sensaziunal», ch’ina vischnanca mussia per marketing tant curaschi.

Tabla da scumond.
Legenda: Cun quest purtret ha Bravuogn sevglià ensemen cun l'agenura turitgaisa l'interess per fotografias da Bravuogn. mad

Be paucas reacziuns positivas

La novitad, ch’ils da Bravuogn na laschian betg fotografar lur vischnanca e ch’els hajan schizunt previs chastis, per tgi che fa quai tuttina, è ida via raits socialas enturn il mund. Las reacziuns èn multifaras, dentant tenor l'agentura da novitads svizra SDA, per gronda part negativas.

Agentura realisà differentas ideas cun lieus grischuns

Quai n’è betg l’emprima giada, che l’agentura da reclama Jung von Matt/Limmat ha fatg furori cun in’idea per posiziunar in lieu da vacanzas grischun en la percepziun internaziunala.

Tar lur acziuns tutgan per exempel il telefon en vischnanca da Tschlin u gia dapi intgins onns ils dus capricorns Gian e Giachen.

Telesguard 17:45