Siglir tar il cuntegn
cuntegn

Grischun Central Brass Band Cazas fa grond Kino

Or da musica electronica da Daft Punk creescha la Brass Band Cazas in concert visual tut spezial. Musicistas e musicists accumpognan musicalmain in film animà dal 2003. Il concert da quest onn è pia era ina sort Kino.

Legenda: Guardar il video Impressiuns Brass Band Cazas. Durada 01:01 minutas.
Or da RTR dals 08.05.2017.

L’idea saja vegnida dal president Hardy Pirovino. Lura saja tut ì magari svelt. Ins ha chattà in cumponist, sclerì ils dretgs e guardà tge ch’i dovra tut. Ussa sajan ins cuntent d’avair instradà l’entira chaussa, conferman ils responsabels.

Dirigent questa giada era reschissur

Il pli grev pensum ha il dirigent. El sto d’ina vart guardar che tut tuna bain e da l’autra vart è el era responsabel che la musica va si cun il maletg dal film ch’ins vegn a vesair durant ils concerts davos la band. Quai saja dapli lavur per el, manegia il dirigent Enrico Calzaferri, dentant na vul el betg discurrer d’in stress.

Trais giadas grond Kino per ureglias ed egls

Il film Interstella 5555 è vegnì producì da la band da musica electronica Daft Punk l’onn 2003, quai ensemen cun in album da musica. La cumbinaziun ha lura dà in film animà da passa in’ura. Durant l’entir film è sulettamain dad udir musica da Daft Punk senza discurs u dialogs.

En il Giapun è il film da quella giada vegnì mussà en blers kinos, en l’Europa perencunter mo darar. Il film mussa l’istorgia d’ina band interstellara che vegn rapinada dad ina gruppaziun nauscha ch’emprova da far grond profit or da la band. La band emprova da scappar e mussa durant il film era aspects negativs e critics da la scena da musica.