Siglir tar il cuntegn
Inhalt

Grischun Central Bogn Savognin: Surses decida a l’urna

Il suveran da la nova vischnanca Surses che va en vigur l’entschatta da l’onn proxim, decida ils 10 da schaner a l'urna davart ina contribuziun per il bogn che fa part al project «Viols», che prevesa la construcziun d’abitaziuns da vacanzas, in hotel ed in bogn.

Fotomontascha project viols cun hotel e bogn al lai Barnagn.
Legenda: Gist davos il parcadi ch'è la stad in lai, duess il nov hotel vegnir construì a partir da la primavaira proxima. mad
Il president communal da Savognin ha infurmà detagliadamain davart ils detagls dal project.
Legenda: Il president communal da Savognin ha infurmà detagliadamain davart ils detagls dal project. RTR, F. Belotti

Gia ils 14 da november decida il suveran da la vischnanca transitorica Surses, sch’el vul recumandar in gea u in na per mauns da l’urna. Era cun in na va il project a l’urna. Uschia è la populaziun dal Surses vegnida infurmada en la davosa saira d’infurmaziun.

Surses sa participetscha vi dals custs

Votà vegn davart ina participaziun da quatter milliuns vi dal bogn cuvert da divertiment. Ultra da quai vegn decidì davart ina participaziun annuala da 400’000 francs vi dals custs dal bogn. Il bogn è ina part dal project che prevesa dasperas il bogn in hotel ed abitaziuns da vacanzas administradas, quai en la dimensiun da 106 milliuns francs.

Atgnamain vuleva la vischnanca da Savognin decider gia il november davart ils quatter milliuns, pervi d’in recurs da duas persunas da Beiva cunter l’agir da la vischnanca da Savognin decida ussa la nova vischnanca Surses davart la participaziun finanziala.