Siglir tar il cuntegn
cuntegn

Grischun Central Blera birocrazia per il Parc Ela

Enfin la fin da quest onn sto l’uniun Parc Ela inoltrar la dumonda per la finanziaziun per ils onns 2020 – 2023. Il 2020 sto il Parc Ela inoltrar la dumonda per il manaschi dals onns 2022 – 2032. «I suondan onns cun blera birocrazia», ha ditg il manader da fatschenta dal Parc Ela Dieter Müller.

Il glatscher da Porchabella en il territori dal Kesch.
Legenda: Il glatscher da Porchabella en il territori dal Kesch. Parc Ela: Lorenz Andreas Fischer

Actualmain fan part al Parc Ela las vischnancas Albula/Alvra, Bravuogn-Filisur, Lantsch, Schmitten e Tagn/Wiesen ch'è ina fracziun da Tavau. Era sche Tinizong-Rona e Riom-Parsonz mancan il mument en il perimeter dal parc, n’èsi betg previs da trair da nov ils cunfins avant l’onn 2022. Il Parc Ela haja discutà quai cun la vischnanca da Surses ed ins saja vegnì tar la conclusiun ch’i saja il pli perdert dad integrar quels vitgs en la nova perioda da manaschi da diesch onns dal parc, ha ditg Dieter Müller.

Finanzialmain sa participescha l'entira vischnanca da Surses gia oz al Parc Ela, quai cun pajar ina contribuziun per mintga abitant. Ins haja era gia fatg lavurs da revitalisaziun a Tinizong-Rona che n'è atgnamain betg en il parc, uschia il manader da fatschenta dal Parc Ela.

RR actualitad 12:00