Siglir tar il cuntegn

Header

cuntegn

Biodiversitad La lieur brina svanescha en il Signuradi

Tenor dumbraziuns tranter Fläsch e Malans è il dumber da lieurs brinas sa sminuì massiv.

La primavaira datti duas dumbraziuns da lieurs en il Signuradi. Il mars vegn tschertgà lieurs en il territori da test tranter Fläsch e Malans, e quai cun agid da reflecturs

Ils davos quatter onns n'avain nus betg dumbrà ina suleta lieur en il territori tranter Fläsch e Malans. Il fatg che la lieur brina vegn strusch da viver pli en quest territori è in fatg che fa schon in pau tema.
Autur: Hannes JennyBiolog da selvaschina dal chantun Grischun

La segunda dumbraziun che vegn fatga l'avrigl cumpiglia dapli surfatscha. Quai ord il motiv, ch'ella vegn realisada durant il temp cura che era ils tschiervs vegnan dumbrads. Ma era tar lezza dumbraziun vesan las cifras ora sumegliant. Suenter la stad chauda da l'onn 2003 avevan ins dumbrà anc 70 animals. Dapi lura sajan las cifras dentant idas enavos successivamain. Ussa sajan mo pli tranter 10 fin 15 animals en l'entir territori extendì.

Che la lieur svanescha ha differents motivs

Il svanir da la lieur brina en il Signuradi ha tenor Hannes Jenny differents motivs. La cultivaziun intensiva da l'agricultura saja segir in motiv dentant era il clima gioghia ina rolla. Las primavairas frestgas ed umidas èn da dischavantatg per las lieurs brinas. Il chantun analisescha ed evaluescha las cifras anc pli detaglià e vegn a reagir sche necessari.

Opziuns da meglierar la situaziun da viver per las lieurs fissan, da tschertgar ils discurs cun ils agriculturs u era entras crear territoris da protecziun.

RR actualitad 12:00