Siglir tar il cuntegn
Inhalt

Grischun Central Bilantscha positiva suenter emprims 100 dis Albula/Alvra

Dapi trais mais è la nova vischnanca Albula/Alvra en vigur. Il president communal Daniel Albertin è cuntent e tira ina bilantscha positiva.

Daniel Albertin, il president communal da la vischnanca Albula/Alvra en ses biro a Casti.
Legenda: Daniel Albertin, il president communal da la vischnanca Albula/Alvra en ses biro a Casti. RTR, F. Belotti

Ils emprims trais mais sajan stads fitg intensivs: «Nus avain fatg diversas restructuraziuns ed avain fatg bleras sururas», resumescha Daniel Albertin. La renovaziun e l'engrondiment da l’administraziun a Casti saja gartegiada. Era la pagina d’internet da la vischnanca progredeschia adina dapli, per il futur saja planisà ch’ins possia far dapli online, sco per exempel chargiar las marcas da rument direct giu da l’internet, di il president communal. Uschia ins stoppia adina pli pauc ir persunalmain sin chanzlia. Ina gronda sfida resta: «Nus empruvain, da dar il sentiment che nus essan ina suletta vischnanca che consista da set fracziuns». Quai vegnia ad esser ina gronda sfida, ma ins emprovia da far il meglier, e mussar ch’ins veglia far insatge per tuts, uschia Daniel Albertin.

Las set fracziuns

La vischnanca Albula/Alvra è ina fusiun da las anteriuras vischnancas politicas Alvagni, Alvaschagn, Brinzauls, Casti, Mon, Stierva e Surava. La vischnanca dumbra radund 1’370 abitants. La surfatscha munta a 9’398 hectaras. Ils lungatgs uffizials èn tudestg e rumantsch surmiran. La vischnanca vala sco bilingua.