Siglir tar il cuntegn
cuntegn

Grischun Central Betg pli Tusaun - Albula/Alvra duai sa distatgar da l'ospital

La suprastanza communala da la vischnanca Albula/Alvra propona al suveran, da sa participar en l'avegnir a la regiun d’ospitals Surses e da sa distatgar da Tusaun. Plinavant duai la scola primara restar a Lantsch.

L'ospital da Tusaun.
Legenda: L'ospital da Tusaun. mad

Sco quai ch’igl è da leger en il messadi per la radunanza communala dals 12 da december sto la vischnanca Albula/Alvra decider anc quest onn, vi da tge regiun d’ospitals che la vischnanca duai sa participar en l’avegnir.

«Per plazzas da lavur - cunter spaisas supplementaras»

Tenor la suprastanza communala faschessi senn, da sa participar en l’avegnir vi da la regiun d’ospitals Surses. Per l’ina per mantegnair plazzas da lavur en la regiun e da rinforzar la regiun, e per l’autra pretendian las structuras da l’ospital da Tusaun ina participaziun da las vischnancas vi dal deficit annual.

L’ospital da Savognin perencunter na pretendia betg ina tala garanzia da deficit, plitost saja l’ospital sfurzà da lavurar uschia, ch’i na dettia nagin deficit.

Tenor il messadi na duai per ils pazients dar naginas restricziuns cun la midada da la regiun d’ospitals, cun quai ch’i valia en Svizra la libra tscherna dal medi e dal’ospital.

La scola renovada da Lantsch.
Legenda: La scola renovada da Lantsch. RTR, Federico Belotti

Scola primara a Lantsch

En il messadi da fusiun da la vischnanca Albula/Alvra steva scrit, che tut las scolaras ed ils scolars duain a media vista ir a scola dadens il territori da la vischnanca fusiunada. La suprastanza communala propona però, da mantegnair la scola ordaifer il perimeter da la vischnanca fusiunada.

La scola rumantscha primara a Lantsch saja sa cumprovada: Ils transports sajan vegnids optimads, i dettia classas cun ina buna grondezza e la magistraglia garanteschia ina furmaziun ferma. Plinavant correspundia l’infrastructura a Lantsch era a las pretensiuns futuras cun il plan d’instrucziun 21, che vala a partir da l’onn da scola 2018/19.

Il suveran decida ils 12 da december

Ils 12 da december decida la radunanza communala davart las dus tractandas descrittas. Plinavant vegn decidì davart il preventiv dal 2017. Ultra da quai propona la suprastanza communala, da mantegnair il pe da taglia sin 100% da la taglia chantunala simpla.

RR actualitad 08:00