Sco quai ch’il gestiunari dal tancadi ha confermà envers RTR, haja el fatg in sbagl cura ch’el haja programmà il pretsch dal benzin. I sa tractia d’in sbagl dal comma, uschia haja el programmà 15.9 raps empè da 1.59 francs. A savair dal sbagl saja el vegnì entras ina persuna ch’haja fatg attent el, ch’en il Facebook vegnia fatg reclama per ils pretschs bas dal benzin a Beiva. Malgrà in'intervenziun immediata sajan vegnids vendids passa 600 liters benzin per quest pretsch betg realistic.
Avant il tancadi saja sa furmada ina colonna d’autos che vulevan tancar per in pretsch fitg favuraivel, per part hajan ils clients dal tancadi era gist emplenì lur canisters da benzin. In'assicuranza che paja il donn ha il gestiunari dal tancadi betg, ha el tradì envers RTR.
In tal sbagl na fiss betg pussaivel tar in furnitur grond da benzin
Tar ils furniturs gronds da benzin na fiss in tal sbagl betg pussaivel. Tar il furnitur da petroli Coop dettia quai per exempel ina limita minimala ed ina limita maximala, uschia ch’in donn pli grond na pudess betg capitar. Quai ha confermà il post da medias dal Coop. Tar Coop vegnian ils pretschs dal benzin plinavant actualisads automaticamain sur l’internet.