Siglir tar il cuntegn

Header

Video
Snowfactory – La fabrica da naiv a Lantsch
Or da Minisguard dals 02.11.2019.
laschar ir
cuntegn

Arena da biatlon Lantsch Plattinas da glatsch sco garanzia da vita

Dapi l'emprim da november èn 1,5 km loipa preparads en l'Arena da biatlon a Lantsch. Per pudair far quai han ils responsabels producì durant bun 6 emnas naiv. Quai cun la metoda d'ennavar «snowfactory».

Dapi il november 2015 lavuran ils responsabels da l'Arena da biatlon a Lantsch cun la metoda da «snowfactory». L'indriz ch'è en in container producescha pitschnas plattinas da glatsch per la loipa e quai er tar temperaturas pli autas che chanuns da naiv convenziunals. Quai è il grond avantatg cumpareglià cun la metoda da far naiv ch'ins enconuscha en ils territoris da skis. Uschia possian ins garantir in cumenzament baud en la stagiun da biatlon e passlung, di il mainafatschenta da l'arena Silvio Baselgia.

Snowfactory

Personen-Box aufklappenPersonen-Box zuklappen

La naiv artifiziala vegn producida cun in'apparatura che sfradenta aua. Quell'aua vegn sfradentada enfin ch'ella schela – uschia ch'i dat pitschnas plattinas da glatsch. Entras la preparaziun da la loipa cun ina maschina da pista sa transfurmeschan las plattinas en naiv. Il grond avantatg da questa metoda è ch'ins po er producir naiv tar temperaturas pli chaudas.

In start ad uras

Malgrà che l'aura ha anc laschà tremblar in zic ils responsabels han els pudì preparar ad uras ils 1,5 kilometers. Duvrada vegn quella cunzunt da teams d'elita ed equipas naziunalas. Tranter auter vegnan las biatletas ed ils biatlets svizzers a trenar a Lantsch. Plinavant garantescha la naiv artifiziala las occurenzas da la cuppa mundiala da juniors sco er dal Tour de ski il december. Ord quels motivs saja la metoda da «snowfactory» l'ideala – senza las occurenzas d'elita pudessian els gnanc mantegnair il manaschi da l'Arena da biatlon, di Silvio Baselgia.

RR actualitad 08:00