Siglir tar il cuntegn
Inhalt

Grischun Central Archeologs fan novas scuvertas en il Surses

Dapi il 2013 fan students da l’universitad da Turitg ensemen cun archeologs exchavaziuns en il Surses. Ina gronda exchavaziun datti en Val Faller sur Mulegns.

A Plaz en Val Faller vegn il mument chavà.
Legenda: A Plaz en Val Faller vegn il mument chavà. RTR, F. Belotti

En Val Faller vegn il mument chavà en in lieu, nua ch’i vegniva elavurà arom. Ils students quintan, d’avair chattà in furn che vegniva duvrà enturn il setavel tschientaner avant Cristus per gudagnar arom.

Sco quai che Mirco Brunner, il manader da l’exchavaziun da l’Universitad da Turitg ha ditg, giajan las lavurs a fin la mesemna. Fin lura saja quai franc, sch’i sa tractia propi d’in furn vegl.

20 studentas e students en acziun

L’intent da quellas lavurs che vegnan fatgas gia il quart onn en seria è da vegnir da savair dapli da l’explotaziun d’arom e davart l’elavuraziun da metal. Radund 20 students ed archeologs han examinà differents lieus en il Surses, per vegnir da savair dapli dal temp preistoric.