Siglir tar il cuntegn

Header

video
Galaria d’art empè da sbuvada
Or da Giuventetgna dals 14.04.2021.
laschar ir. Durada: 1 minuta 2 Secundas.
cuntegn

Andeer Galaria d’art empè da sbuvada

Dapi l’atun passà mainan las soras Maria Crottogini-Melchior e Sabina Melchior ina stalla d’art ad Andeer. Sbuvar il clavà da l’onn 1720 n’è mai stà in tema per las dus soras, ed empè da laschar vid il clavà han ellas fatg ordlonder la «Stalla Melchior».

En la stalla ad Andeer vegnan exponidas diversas chaussas. Ils maletgs en colurs d’ieli e pastel derivan da Maria Crottogini-Melchior. Ses stil fa il pass davent dal concret envers l’abstract. Exponidas vegnan era maisas fatgas da ses figl Michelangelo Crottogini. El è scrinari da mobliglia e dissegna sez e fa lavurs spezialas en ses lavuratori. Dasperas è el era in fotograf autodidact.

audio
Gallaria d'art en stalla ad Andeer
ord Actualitad dals 10.04.2021.
laschar ir. Durada: 3 minutas 47 Secundas.

Bleras fotografias en la stalla d'art

Plinavant èn exponidas en la stalla d’art fotografias da Sabina Melchior. Ella è ina fotografa versada ch’ha fatg ord sia passiun ina part professiunala. Tranter auter fotografescha ella nozzas, festas da famiglias e tuttas sorts occurrenzas ed ella accumpogna era fotograficamain la construcziun da bajetgs. Sia gronda passiun è il fotografar utschels.

Galaria amez vischnanca

La «Stalla Melchior» sa chatta a la via Granda ad Andeer. Tar il bain dals Melchiors tutga era ina chasa d’abitadi. En questa chasa è creschì si il bab da las dus soras ch’han ertà las immobiglias. Sbuvar il clavà na saja mai stà in tema. Ellas veglian mantegnair il caracter da la vischnanca. Per ellas saja stà impurtant che la stalla na restia betg vida.

RTR actualitad 07:00

Artitgels legids il pli savens