Siglir tar il cuntegn
Inhalt

Grischun Central Anc nagins candidats per il presidi da Surses

Ils 20 da settember è l’emprim scrutini per l’elecziun da la suprastanza communala da la nova vischnanca Surses. Tgi che pudess daventar il nov president communal, n’è betg anc enconuschent.

Era il president communal da Cunter ponderescha il mument ina candidatura.
Legenda: Era il president communal da Cunter ponderescha il mument ina candidatura. RTR, F. Belotti

In dals interessents per il presidi è Pauli Dosch da Tinizong, l’inspectur da scola. El vegnia a decider enfin ils 20 d’avust, sch’el vegnia a candidar per l’uffizi u betg. D’ina vart fiss il post fitg attractiv, da l’autra vart spetgian era grondas sfidas en sia professiun cun il plan d’instrucziun 21, ha ditg Pauli Dosch sin dumonda.

In’auter candidat pussaivel è Leo Thomann da Parsonz, ch’è stà dal 1997 enfin il 2010 deputà en il cussegl grond. El vegnia a decider probabel venderdi, sch’el veglia candidar u betg.

Betg gea e betg na per ina candidatura ha ditg Filip Dosch, il president communal da Cunter. Da cuntinuar cun sia lavur sco procuratur professiunal na saja però betg pussaivel, el stoppia l’emprim discutar cun ses emploiader, co ch’i pudess ir enavant cun sia plazza en la curatella professiunala, sch’el avess da candidar sco president communal.

Gia refusà definitivamain ina candidatura per il presidi han il president communal vertent da Savognin, Patric Vincenz e Gian Sonder, il president communal da Salouf. Era il president da l’Uniun da mastirants e commers da Surses Conrad Plaz n’ha nagin interess vi da l’uffizi.

Cumissiun vul s’engaschar per ina persuna adattada

L’Uniun da mastirants e commers da Surses ha instradà ina cumissiun, che vul s’engaschar da chattar in candidat adattà. En quella sa chattan il president da l’Uniun sco era Enrico Uffer e Guido Luzio. Sco quai ch’il president Conrad Plaz ha ditg, saja planisada ina radunanza da nominaziun l’avust.