Siglir tar il cuntegn

Grischun Central Anc nagina soluziun per stan da sajettar Bravuogn

La societad da tir da Bravuogn cumbatta per ses stan da sajettar. Enfin il 2020 stuess quel vegnir sanà per ademplir las novas prescripziuns da la Confederaziun. Ina alternativa fiss da sa participar vi dal stan Crappa Naira a Surava. La vischnanca vul anc quest onn avair ina decisiun en chaussa.

Il stan da tir da Bravuogn stat davant in avegnir intschert.
Legenda: Il stan da tir da Bravuogn stat davant in avegnir intschert. RTR

Sco quai che Luzi Schutz, il president communal da Bravuogn Filisur, ha ditg envers RTR haja el chapientscha che la societad da tir vul mantegnair ses stan da sajettar a Bravuogn. Da l’autra vart è el da l’opiniun che l’uniun pudess surviver era sch’ella stuess en l’avegnir ir a Surava a sajettar. Ins veglia anc quest onn savair sch’ins veglia sanar il stan da tir a Surava u sch’ins veglia sa participar vi dal stan a Surava.

Tenor in’offerta da l’uniun d’interess Stan da tir regiunal Crappa Naira pudess Bravuogn sa participar a Surava per ina pauschala da radund 18’000 francs. La sanaziun dal stan da tir a Bravuogn custass probabel dapli che 60’000 francs, ha ditg il president communal da Bravuogn Filisur, senza da sa referir sin cifras definitivas.

RR actualitad 08:00