Siglir tar il cuntegn

Grischun Central «Alpen Challenge» sto vegnir scursanida

Pervia d'ina bova en la Val San Giacomo na po la cursa da velo «Alpen Challenge» betg passar il Pass dal Spleia. Ella passa perquai mo ils dus pass Alvra e Güglia.

ciclists a la «Alpen Challenge»
Legenda: «Alpen Challenge» la cursa populara da velo sto vegnir scursanida. mad, alpenchallengelenzerheide.ch

La cursa populara da velo «Alpen Challenge» cun partenza ed arrivada en l’Arena da biatlon a Lantsch sto vegnir scursanida. Pervia d'ina bova en la Val San Giacomo è il Pass dal Spleia serrà parzialmain. Uschia datti quest onn mo la varianta curta da l’«Alpen Challenge» sur 116 kilometers sur ils Pass Alvra e Güglia, communitgeschan ils organisaturs.

La varianta lunga sur il Spleia croda

Pervia da la bova sur la claustra da Gallivaggio en la Val San Giacomo han las autoritads talianas serrà questa part da la via dal Spleia, respectiv ella è averta mo mintgamai per curts muments. Malgrà ch’ina gronda part dal grip betg stabil è gia crudà a val, quintan ins cun ulteriuras bovas ed il ristg da passar il tschancun cun velo è tenor las autoritads memia grond. Uschia croda la varianta lunga da l’«Alpen Challenge» da 190 kilometers sur ils Pass da l’Alvra, Malögia e Spleia e las ciclistas ed ils ciclists ston uschia era desister tranter auter da passar la Bregaglia e la Viamala.

1’500 ciclists da hobi sin via tras il Grischun

La «Alpen Challenge» è ina da las grondas cursas popularas da velo sur divers pass dal Grischun. Sco lieu da partenza e d’arrivada nizzegian ils organisaturs dapi intgins onns l’infrastructura da l’Arena da biatlon a Lantsch. Avant partevan las radund 1’500 ciclistas e ciclists amez il vitg da Lantsch.