Siglir tar il cuntegn

Header

cuntegn

Grischun Central Albula/Alvra vul investir bunamain 2,9 milliuns francs netto

Investiziuns pli grondas vegn i a dar per la sanaziun da la via da quartier Cumpogna a Casti e da las vias communalas da Stierva. Er la colliaziun d'urgenza dal provediment d'aua ed energia Crest-Vazerol stat sissum la glista d'investiziuns.

Plinavant sto vegnir sanà il provediment cun aua da baiver Surava, la colliaziun da la chanalisaziun Alvaschagn cun la ARA Casti sco er l'access a guauds ed alps a Stierva.

Malgrà grondas investiziuns quinta la vischnanca l'onn proxim cun in gudogn da 402'100 francs. Las expensas muntan a 13'856'400 francs.

La radunanza communala ha approvà il preventiv 2016 e decidì da laschar il pè da taglia tar 100% da la taglia chantunala simpla. Quest pè da taglia era vegnì fixà tar l'approvaziun dal contract da fusiun, l'avrigl 2015.

Plinavant han ils preschents approvà ils quints 2014 da tut las vischnancas fusiunadas, e quai, cun 57 cunter ina vusch tar ina abstenziun.

Il project da prevenziun da bovas cuntinuescha

En la regiun da Brinzauls èn vegnidas fatgas ils ultims onns investiziuns per prevegnir a bovas e crudada da grippa. La vischnanca fusiunada vul cuntinuar cun il project da prevenziun e metta a disposiziun in credit brutto da 250'000 francs per ils onns 2016 - 2019. Ina gronda part da quels custs surpiglian dentant la Confederaziun ed il chantun.

Artitgels legids il pli savens